Bandièra01 capçalera  1180x150: Novestivada

Actualitats

Lo paire suicidari de Perpinhan èra ja estat implicat en una desaparicion a Nimes

Segon de fonts de l’enquèsta, Francisco Benítez, paire e marit de las doas femnas desaparegudas a Perpinhan lo 14 de julhet passat, foguèt enquestat per la polícia, en 2004, per la desaparicion d’una femna a Nimes. Benítez se suicidèt diluns passat, tres setmanas après la desaparicion de sa femna e de sa filha.


La femna desapareguda en 2004, a Nimes, seriá la companha de Francisco Benítez. L’òme seriá estat enquestat per la polícia coma testimòni. Segon l’AFP, Benítez auriá negat èsser la darrièra persona que la vegèt. La femna l’an pas jamai trobada.
 
Una autra font soslinha las similituds entre aquela desaparicion e las del 14 de julhet passat a Perpinhan (Païses Catalans) de Marie-Josée Benítez e de sa jove filha Allison, aspiranta al títol de Miss. En 2004, Francisco Benítez denoncièt pas la desaparicion fins que foguèt enquestat per la polícia, e al moment d’o far diguèt que la femna s’èra enanada après una discussion e que li aviá dich per SMS que tornariá pas.
 
Benítez se suicidèt diluns passat, de matin, als privats dels locals de la legion estrangièra a Perpinhan, ont trabalhava, tres setmanas après la desaparicion de sa filha e de sa femna. I a pas cap de nòva de la jove Allison, qu’a 19 ans e qu’es aspiranta al títol de Miss Rosselhon, nimai de sa maire, Marie-Josée, de 53 ans. Las vegèron per lo darrièr còp lo 14 de julhet a Perpinhan.
 
Benítez enregistrèt un vidèo abans de se suicidar, que foguèt publicat sul sit de Paris Match. Dins l’enregistament parla en francés amb un accent espanhòl marcat e, amb emocion, ditz qu’es al limit.
 
La maire e la filha desaparegudas an pas emplegat lors telefòns mobils ni lors cartas de crèdit. Lors paginas de Facebook e d’autres rets socials son pas estadas mesas a jorn.
 
Las autoritats francesas contunhan la recèrca e an demandat que las personas que pòscan aver d’informacions sus las desaparegudas contacten per telefòn lo comissariat de Perpinhan, al 0 800 35 83 35 dempuèi l’estat francés.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Carles
1.

Saique Francisco Benítez s'acusèt en causissent de se balhar la mòrt. Mas demòra un biais curiós que de far una vidèo ça que la (coma un besonh prigond d'o far saber ... soi ieu que tuèri que la femna e la dròlla). Me demandi cossí van far per trobar los còrses d'aquelas doas pauròtas d'ara enlà. Tanplan calriá que foguèsson trobadas ...

  • 1
  • 0

Escriu un comentari sus aqueste article