Bandièra01 capçalera  1180x150: Novestivada

Actualitats

Malhòrca se mobiliza pel catalan fàcia als atacs del govèrn regional

Revendican una lenga viva dins totes los camps de la vida publica e critican lo desmantelament dels dreches lingüistics atenches fins ara

| OCB

Tèxte legit

Aperaquí 40 000 personas segon los organizaires (7000 segon la polícia) manifestèron dimenge passat per la lenga catalana e contra las politicas lingüisticas del govèrn de las illas Balearas, comandat per la drecha espanholista amb lo sosten de l’ultradrecha.

“Exigissèm dels poders publics que compliscan lor obligacion legala de protegir e promòure la lenga catalana. Exigissèm de las fòrças politicas democraticas qu’agiscan unitàriament fàcia a aquela minoritat fanàtica que vòl far desaparéisser [lo catalan]”, çò diguèt dins son parladís lo president de l’Òbra Culturala Baleara en tot apondre que vòlon que la lenga siá “viva, per nòstras carrièras e sus nòstras plaças, dins totes los domenis de la vida publica, dins nòstras escòlas, centres de santat e espitals, dins l’administracion, pertot”. De soslinhar que l’actual govèrn regional es a establir de reglaments qu’eliminan la requeréncia de saber lo catalan per trabalhar dins lo servici de la santat o dins l’administracion publica e que vòl establir un modèl d’educacion ont i aja l’opcion d’aprene solament en espanhòl. En mai d’aquò, lo rei d’Espanha ven de concedir lo títol de “reiala” a una pretenduda acadèmia per la quala la lenga de las illas Balearas es pas de catalan e que crèa una grafia secessionista.

Se prenèm en compte las dimensions de l’illa, los empediments de las autoritats pertocant los transpòrts en comun e lo non-retirament de las terrassas dels bars per carrièras, la manifestacion es estada un succès enòrme dempuèi la granda manifestacion per la lenga de 2019.

 

 

 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Jòrdi Caldentey Manacòr (Malhòrca)
1.

Los malhorquins resistirem la colonizacion espanhòla e reconquestarem la nòstra tèrra plan lèu.

  • 19
  • 1

Escriu un comentari sus aqueste article