Lo govèrn de Catalonha a decidit de refortir l’ensenhament de las lenga e cultura catalanas en Catalonha Nòrd amb una subvencion de 650 000 èuros a l’Associacion dels Amics de la Bressola. La soma servirà per ajudar a finançar las despensas del personal d'ensenhament de las escòlas de la Bressola ongan, çò rapòrta Vilaweb.

Aquelas escòlas fan contribuisson a la creacion e al mantenement de l’ofèrta d’ensenhament qualitós en catalan en Catalonha Nòrd. L’Associacion dels Amics de la Bressola es una entitat de tòca non lucrativa que la creèron l’istorian e politician Francesc Ferrer e l’escrivan Enric Larreula, amb l’objectiu d’assegurar la subrevivéncia de las escòlas Bressola de Catalonha Nòrd. L’associacion se constituiguèt legalament en 1986.

Quant a la Bressola, es una associacion culturala creada a Perpinhan en 1976 per promòure una ret d'escòlas associativas que practican l'immersion lingüistica en catalan dins los parçans de Catalonha Nòrd. Seguís un modèl similar al de la Calandreta occitana, del Diwan breton, de la Seaska basca e de las escòlas alsacianas ABCM-Zweisprachigkeit.