Bandièra01 capçalera  1180x150: Novestivada

Actualitats

Eleccions en Catalonha: desfacha de l’independentisme d’esquèrra

La formacion de Carles Puigdemont es lo sol partit que ganha de vòtes e de deputats del temps que la CUP e sustot ÈRC s’enfonzan

La victòria en vòtes e sètis dels socialistas sarran son candidat, Salvador Illa, de la presidéncia de la Generalitat
La victòria en vòtes e sètis dels socialistas sarran son candidat, Salvador Illa, de la presidéncia de la Generalitat

Tèxte legit

L’independentisme catalan a perduda sa majoritat absoluda al Parlament de Catalonha. Pel primièr còp dempuèi fòrça annadas, lo Partit Socialista (PSC), filiala del PSÒE, s’es impausat a las urnas a l'encòp en vòtes e en deputats a las eleccions regionalas de dimenge passat. Los independentistas d'extrèma esquèrra de la CUP e sustot los de centresquèrra d'ÈRC an patida una fòrta davalada e solament la formacion centrista de Junts (Amassa per Catalonha) del president exiliat Puigdemont capita una pojada e se consolida coma primièra fòrça independentista. Lo Parlament de Catalonha ven, après lo vòte de dimenge, majoritàriament espanholista mas extrèmament fragmentat pr’amor de las diferéncias ideologicas entre l'esquèrra e la drecha, e las possibilitats de bastir d’acòrdis per causir un govèrn pareisson escassas. Tot sembla d’indicar que caldrà tornar far las eleccions en octòbre.

Sens fuèlh de rota independentista e amb lo lagui de bona part dels electors independentistas, Junts, ÈRC e CUP an atenches sonque 59 deputats (en 2021 n’atenguèron 74). E mai s'i comprenguèssem los dos deputats de la nòva formacion ultradrechista Aliança Catalana, que sas orientacions politicas xenofòbas e islamofòbas son rebutadas pels autres sobeiranistas catalans, l’independentisme auriá pas la majoritat absoluda del Parlament, qu’es fixada a 68 deputats.

La formacion de Carles Puigdemont cercava de recobrar la primièra plaça dins l’independentisme e o a ben capitat en ganhant 3 deputats de mai. La formacion ÈRC, del president en foncions, Pere Aragonès, a patida una desbranda en perdent 13 deputats. La CUP, en plen procès de refondacion, a cinc deputats de mai, reducha a quatre representants.

La victòria en vòtes e sètis dels socialistas sarran son candidat, Salvador Illa, de la presidéncia de la Generalitat, mas los paches eventuals son fòrça malsegurs e ideologicament incompatibles, e doncas es mai probable que calga tornar far las eleccions en octòbre. Dins aqueste cas, l’independentisme a l'escasença a recobrar lo milion de vòtes qu'a perdut, probablament, a causa de la guèrra intèrna per l’egemonia e la manca d'estrategia comuna qu’an alassats e desmotivats los ciutadans independentistas. Ça que la, los partits pròindependéncia deurián mostrar una generositat inaudita per se presentar units e retrobar la fisança dels electors decebuts pel projècte de secession ara per ara avortat.

 

 

 


Consultatz los resultats (en occitan)

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Jean-Marc 12
1.

"L’independentisme catalan a perduda sa majoritat absoluda...
"Los independentistas d'extrèma esquèrra de la CUP e sustot los de centresquèrra d'ÈRC an patida una fòrta davalada..."
Fòrça interessant l'emplec de la règla d'acordar lo PP conjugat amb l'auxiliari "aver" amb lo COD plaçat après lo vèrb... Un biais de far tradicional de Roèrgue e pauc espandit en defòra ! De legir lo libre d'Hans STROH qu'a estudiat l'acòrd en occitan roergàs...

  • 2
  • 1

Escriu un comentari sus aqueste article