L’independentisme catalan a perduda sa majoritat absoluda al Parlament de Catalonha. Pel primièr còp dempuèi fòrça annadas, lo Partit Socialista (PSC), filiala del PSÒE, s’es impausat a las urnas a l'encòp en vòtes e en deputats a las eleccions regionalas de dimenge passat. Los independentistas d'extrèma esquèrra de la CUP e sustot los de centresquèrra d'ÈRC an patida una fòrta davalada e solament la formacion centrista de Junts (Amassa per Catalonha) del president exiliat Puigdemont capita una pojada e se consolida coma primièra fòrça independentista. Lo Parlament de Catalonha ven, après lo vòte de dimenge, majoritàriament espanholista mas extrèmament fragmentat pr’amor de las diferéncias ideologicas entre l'esquèrra e la drecha, e las possibilitats de bastir d’acòrdis per causir un govèrn pareisson escassas. Tot sembla d’indicar que caldrà tornar far las eleccions en octòbre.

Sens fuèlh de rota independentista e amb lo lagui de bona part dels electors independentistas, Junts, ÈRC e CUP an atenches sonque 59 deputats (en 2021 n’atenguèron 74). E mai s'i comprenguèssem los dos deputats de la nòva formacion ultradrechista Aliança Catalana, que sas orientacions politicas xenofòbas e islamofòbas son rebutadas pels autres sobeiranistas catalans, l’independentisme auriá pas la majoritat absoluda del Parlament, qu’es fixada a 68 deputats.

La formacion de Carles Puigdemont cercava de recobrar la primièra plaça dins l’independentisme e o a ben capitat en ganhant 3 deputats de mai. La formacion ÈRC, del president en foncions, Pere Aragonès, a patida una desbranda en perdent 13 deputats. La CUP, en plen procès de refondacion, a cinc deputats de mai, reducha a quatre representants.

La victòria en vòtes e sètis dels socialistas sarran son candidat, Salvador Illa, de la presidéncia de la Generalitat, mas los paches eventuals son fòrça malsegurs e ideologicament incompatibles, e doncas es mai probable que calga tornar far las eleccions en octòbre. Dins aqueste cas, l’independentisme a l'escasença a recobrar lo milion de vòtes qu'a perdut, probablament, a causa de la guèrra intèrna per l’egemonia e la manca d'estrategia comuna qu’an alassats e desmotivats los ciutadans independentistas. Ça que la, los partits pròindependéncia deurián mostrar una generositat inaudita per se presentar units e retrobar la fisança dels electors decebuts pel projècte de secession ara per ara avortat.

Consultatz los resultats (en occitan)