Lo prumèr album deu cantador de rap d’Auloron Kbek que sortirà lo 23 de mai qui arriba. L’album qu’a per nom ILURO 2000.0 e contien 18 pistas, dont ueit ja son disponiblas sus YouTube, dab ueit navèths tèmas e un petit clip de la cançon “49-3” en duo dab Arnaud Belio.

Per las soas cançons, l’album qu’abòrda divèrs tèmas, anant de la politica e deus enjòcs sociaus a la poesia, en passant per la valorizacion de l’univèrs locau. L’accent qu’ei metut tanben sus subjèctes leugèrs e divertissents.

Lo títol ILURO 2000.0 que he referéncia a la vila d’Auloron, ancianament coneguda devath lo nom latinizat Iluro. Lo “2000.0” qu’evòca los 2000 ans d’istòria de la vila, en exprimint ua volontat de modernizacion peu virat d’uèlh au tèrme “2.0”.

L’album qu’ei lo hrut d’ua collaboracion enter l’artista, los sons amics Arnaud Belio e Zifsi, atau com lo son cosin Napco. La familha e los amics qu’an tanben contribuit en prestant la lor votz entaus còrs e entà las votz addicionaus.

Crompader en CD dens quauques petitas botigas locaus au prètz de 10 èuros, l’album que serà tanplan disponible en linha sus YouTube, Bandcamp e las plataformas d’streaming après la soa sortida.

Kbek. ILURO 2000.0. Kbek, 2024. 18 cançons.

Àudio sintetizat automaticament per votz.eu