Manjar de kiwis pòt balhar una excellenta quantitat de vitaminas al còrs uman segon los darrièrs estudis. Es un fruch fòrça ric en vitamina C e lo sieu benfach per la santat es ja demostrat dempuèi d’annadas. En mai d’aquò, ara, un nòu estudi de l’Universitat d’Otago a confirmat qu’una dièta rica en kiwi es extrèmament benefica a la nòstra santat.
Car ja fa de temps que tanben es demostrat qu’una dièta rica en frucha e legums es restacada a una melhora santat mentala, car ajudan a luchar contra la depression. E se i a una vitamina qu’i pòt ajudar fòrça es la vitamina C.
Una vitamina de besonh
La vitamina C es un catalizaire d’enzimas qu’ajuda a melhorar lo foncionament del cervèl e tanben permet de se trobar melhor. Lo kiwi conten fòrça vitamina C, gaireben lo doble de l’iranja. Las personas que manjan de manièra regulara de kiwis patisson gaireben pas cap de depression. E aquerisson mai de fòrça per afrontar la vida. E s’i pòt arribar amb sonque doas setmanas de regim de kiwis.
Los cercaires, dirigits per Tamlin Conner, donèron de vitamina C a un grop de personas. Qualques unas ne recebèron mai. D’autras mens. La quantitat de vitamina C dependiá plan de la frucha. “Manjar de kiwis contribuís fòrça a se sentir melhor mentalament, çò diguèt Conner. Es un pichon cambiament en la vida vidanta de las personas que pòt balhar una gigantassa resulta per la nòstra santat”.
Per ansin, los cercaires estudièron la santat de 155 personas amb un nivèl bas de vitamina C. D’autres l’aguèron mai naut après manjar cada jorn de kiwis. Puèi poguèron confirmar que los qu’avián manjat de kiwis avián melhor dormit, èran de melhora umor, e tanben avián melhor endurat l’exercici fisic. E aquò en sonque doas setmanas.
“L’umor tanben depend de la nòstra dièta, çò diguèt Ben Fletcher, de l’Universitat d’Auckland. Los qu’avián recebut mai de vitamina C avián una melhora umor, çò que demòstra qu’alara la siá santat mentala tanben èra melhora. E aquò se produguèt gràcias al kiwi”. (Legissètz la seguida).
Aqueste article es publicat dins Sapiéncia, la revista occitana de divulgacion scientifica, amb la quala Jornalet a un acòrdi de cooperacion. Podètz legir l'article entièr aicí.
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
Coma lo rugbi lo kiwi se fa melhor en Nova Zelanda ... e en Gasconha :) !
https://www.lekiwidefrance.fr/le-kiwi/les-regions-de-production-du-kiwi-en-france/
Mas ieu qu’escrivi sus unMacIntosh-Apple e que vòli venir president de la Republica, mangi de pomas.
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari