Los 13 e 14 de junh venents, Agen aculhirà los Encontres Occitans, un eveniment de mancar pas per totes los passionats de la lenga e de la cultura occitanas. Organizats al còr d’Agenés, aqueles rescontres ofriràn una plataforma unica per debatre de l’avenidor de l’occitan e de las autras lengas minorizadas de l’estat. Lo programa es fòrça ric en escambis, omenatges, parladisses, presentacions, obradors e tanben concèrts e balètis.

Los participants, que sián d’elegits, d’agents publics, de benevòls o de salariats associatius, auràn l’escasença de se retrobar per escambiar, prepausar e imaginar ensems l’avenidor de la lenga occitana. Aquel eveniment a per tòca d’enriquir las perspectivas de desvolopament e de concebre de nòus biaisses de promòure nòstras practicas culturalas.

Las discussions se debanaràn jos la forma de talhièrs tematics que cobriràn mai d'un domeni coma l’educacion, la formacion, la cultura e l’entrepreneiriat. De nombrosas personalitats i confrontaràn lors vejaires e experiéncias, en cercant de formular amb los participants de pistas concretas per l’avenidor.

Aqueles rescontres permetràn tanplan de crosar los testimoniatges e las experiéncias sortidas de las diferentas lengas e culturas autoctònas de l’estat, portant aital un esclairatge preciós suls enjòcs comuns e sus las solucions possiblas.

Los Encontres Occitans son una oportunitat unica de contribuir a la defensa e a la promocion de la lenga. Per i participar se cal marcar sul sit web oficial de l’eveniment.