Bandièra01 capçalera  1180x150: Botiga

Actualitats

Rugbi de XIII: W coma victòria

Aficha Prima del XIII de 2024
Aficha Prima del XIII de 2024 | FFR XIII

Tèxte legit

Aquesta dimenjada, se tenián las mièjas finalas de la Cup. Dissabte, Wigan s’anèt qualificar cò d’Hull FR: 38-6. Dimenge, Warrington s’impausèt largament 46-10 del costat d’Huddersfield. Wigan e Warrington an atal rendètz-vos a Wembley lo dissabte 8 de junh.

Aqueste dissabte 25 de mai, pel compte de la Superliga, los Dragons tornaràn reçaupre los Lops de Warrington a Brutus. Los sostens espèran la victòria mas tanben un jòc mai sostengut e mai ofensiu.

Abans la partida, una granda taulejada al Pargue de las Exposicions, festejarà los 90 ans del XIII Catalan, un dels primièrs clubs a jónher la Liga de XIII en 1934.

 

La prima del XIII a Narbona

 

L’estadi de Narbona serà lo centre del mond occitan e catalan del XIII aqueste dimenge 26 de mai amb la tenguda de quatre finalas:

  • U15: Illa /XIII Catalan

  • U17: Albi-Tolosa

  • U19 entre XIII Catalan e Vilanuèva d’Òlt

  • e la granda finala d’Elèit 1 entre Carcassona e Albi (4 oras del vèspre).

Dins la sason, Albi a ganhat las doas confrontacions, mas Carcassona s’es plan preparat per capitar lo doblat Copa-Campionat. Las partidas dels mèstres del jòc, los dos passats pels Dragons, serà decisiva: Tòni Gigòt costat tarnés e Lucàs Albèrt costat audenc.

 

Autras finalas

 

La finala de Nacionala 1 opausarà Pàmias e Realmont. En Nacionala 2, Vilafranca d’Albigés rescontrarà Sant Martin de Crau. En Nacionala 3, Vilanòva de Menerbés afrontarà los Falcons de Toluges e en Nacionala 4, los Vals seràn opausats al Barcarès.

Las competicions femeninas se clavaràn lo dimenge 2 de junh a Tonens amb 4 finalas: desvolopament, U15-U17, division nacionala e Elèit. En Elèit, las Divessas Catalanas afrontaràn tornar l’Escura.

Dins l’encastre de las partidas qualificativas per la Copa del Mond, las grègas son anadas batre las sèrbas: 32-4, e las irlandesas baton las neerlandesas: 16-12.

 

Lo TO dins lo segond temps

 

A Tolosa, la partida de Championship entre lo TO e Barrow foguèt equilibrada dins lo primièr temps (22-16), puèi Tolosa aumentèt son cabal de punts per una victòria: 38-16.

Novèla partida a Ernèst Wallon aqueste dissabte 25 amb la venguda dels Vikings de Widnes.

 

Dimenjada Magica en Austràlia

 

Aquesta fin de setmana, se debanava lo Magic Round de l’NRL: uèit partidas a l’estadi Suncorps a Brisbane.

Divendres, Canberra batiá Canterbury 24-20, e los Cavals Fòls ganhavan 13-12 fàcia a las Aglas de Mar .

Dissabte, Newcastle dominava los Titans: 28-24; las Làmias fasián onor a lor primièra plaça amb una victòria 38-30 fàcia als Polets; los paures Lapinons perseguissián lor cordelada de desfaitas facia als Vaquièrs: 22-28.

Dimenge, los neozelandeses batián Penrith 22-20, Melbourne domina Parramatta 48-16 e los Dalfins baton los Tigres: 24-12.

Dins lo primièr Estat d’Origina femenin de la sason, Nòva Galas del Sud bat Queensland: 22-12.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article