Lo 22 de junh venent, començarà l’edicion d’ongan del Festen’Òc de Saurat (Savartés), amb un estagi de danças tradicionalas e una fèsta de Sant Joan animada per un balèti amb Tribal e un concèrt de Guillaume Lopez & lo Bal del Lop Trio. L’eveniment comprendrà tanplan l’espectacle de fuòc, lo fuòc de Sant Joan, un aperitiu, un repais, etc.

Puèi, lo Festen’Òc contunharà los 12 e 13 de julhet amb d’estagis, de balètis, de concèrts e de repaisses. De soslinhar la preséncia de Goulamas-K, Camille en Bal, Guillaume Lopez Buf e Votz, l’Orquestrina Trama, la Pèiro Douso, los Booze Brothers e Varalh. Tot es gratuit.

Festen’Òc ven de mai en mai lo festenal occitan de referéncia, ont se viu una occitanitat festiva naturala dins un pichon vilatge e i a de jovenòts que parlan la lenga e que la parlan bèlament. Es un eveniment transversal ont se mesclan de militants occitans, d’alternatius, de festejaires, d’amoroses de danças, d’amoroses de convivéncia, de joves e mens joves que se bandan e furgan, d’afogats de las discussions politicas e del rire.

Per mai d’informacion :

• www.festenoc.com
• facebook.com/festenoc
• instagram.com/festenoc