Aqueste dimenge, a 4 oras del vèspre, al Pargue dels Espòrts de Narbona, l’arbitre fiulèt l’entamenada de la finala d’Elèit 1 entre Carcassona e Albi dins un grand ambient esportiu e festiu. Al rugbi, òm se crèma pas los autocarris, mas òm charra e òm beu un còp amassa!

Sul terren, foguèt pas una partida de poètas entre doas formacions equivalentas. Èra pas lo jorn de las ofensivas descabestradas, mas de las defensas solidas: se caramelizèt de longa!

Dins lo primièr temps, Clamenç Herrero passèt doas penalitats pels audencs. Lo segond temps reprenguèt sus las meteissas basas fins a l’ora de jòc: un còp de pè a seguir de Tòni Gigòt, Brad Wall sauta lo mai naut e rebat la palma per Tristan Dupuy. Ensag tarnés e transformacion de l’arrièr Hellec: los Tigres prenon l’avantatge 6-4.

Carcassona vòl pas plegar. A la 79a minuta, còp de pè de Lucàs Albèrt, lo capitani-alièr Alèxis Escamilla, tal un jogaire de l’NRL, dins una posicion acrobatica, en suspension sus la linha de tòca, remanda la palma sul segonda-linha fijian Mika Serulevu: ensag! Lo planchòt pren lo camin de Ciutat del mercat cobèrt per una serada de fèsta. Una corta victòria 8-6 pels Canaris que ven coronar una sason capitada: 16 victòrias, 2 desfaitas (contra Albi) per la primièra plaça al classament, venceire de la Copa Lòrd Derby e ara, lo bloquièr Max Rousié! Que demandar de mai?

Pels tarneses, la decepcion d’èsser passat tant prèp, lo regrèt de poder pas ajustar la data de 2024 a 1977, lo darrièr còp ont foguèron campions (fàcia a… Carcassona!). Segur que se contunhan dins la meteissa filosofia, un jorn, lo bloquièr tornarà del costat de Mazicon.

D’autres campions

Aquesta jornada narbonesa de Prima del XIII foguèron autrejats tres autres títols de campions:

• en U15, lo XIII catalan bat Illa 28-10

• en U17, larga victòria d’Albi 30-8 fàcia a Tolosa

• en U19, lo bloquièr es pel XIII Catalan que bat Vilanòva d’Òlt: 40-16

La Prima del XIII se perseguís aqueste dimenge 2 de junh sus tres estadis:

• a Tonens per las femeninas: Aigas Vivas-Limós/Lesinhan per las U15-17 (12h15), Entraigas-Clairac en Nacionala (13h45) e Divessas Catalanas-l’Escura en Elèit (16h)

• a Illa per la Nacionala 3: Vilanòva de Menerbés- Falcons de Toluges-Baó (13h30), per la Nacionala 2: Vilafranca d’Albi/St Martin de Crau (15h) e per la Nacionala 4 (Vals 13-Barcarès.

• a St Gaudenç, amb Pamièrs-Realmont en Nacionala 1.

Fèsta e desfaita a Perpinhan

Aqueste dissabte 25 de mai, al Pargue de las Exposicions de Perpinhan, se festejavan los 90 ans del XIII Catalan; 1500 personas prenguèron part a la manifestacion e a la taulejada.

En fin de vèspre, los Dragons recebián los Lops de Warrington que se mostrèron mai realistas per batre 16-8 una formacion locala en pana de vam ofensiu e tancada dins un jòc estequit. L’objectiu èra de clavar la sason primièr o segond en vista d’una mièja finala a domicili, mas aquí va lèu caler pensar a demorar dins los 6 qualificats. Òm pòt totjorn somiar que los discorses del genre “Veiretz divendres lo còp qu’anam faire a Saint Helens” sián pas qu’una doça e trista illusion.

Del temps, en Championship, a Tolosa, los Olimpians batián los Viquings de Widnes: 28-20. Dissabte, los occitans se desplaçaràn a Halifax.

NRL: quaranta punts…

Dins aquesta jornada dedicada als pòbles aborigèns, cada formacion portava un malhòt original amb de creacions artisticas inspiradas de motius tradicionals.

Mai d’una partida vegèt lo venceire despassar la barra dels 40 punts: 44-12 pels Dògols fàcia als Dragons; 42-28 pels Vaquièrs fàcia als Tigres; 44-16; 44-16 pels Pols que van ganhar a Canberra; las Pantèras van ganhar 42-0 a Cronulla; los Lapinons se reviscòlan amb una victòria 42-26 fàcia a las Anguialas .

Los autres ganhants son: los neozelandeses (24-20 fàcia als Dalfins); los Titans: 36-34 cò dels Cavals Fòls, e Manly (26-20 fàcia a Melbourne).