Bandièra01 capçalera  1180x150: Novestivada

Actualitats

Espanha: es aprovada la lei d’amnestia

La tòca es de metre lo ponch final a la repression judiciària contra quatre centenas de personas enseguidas per l’ensag d’independéncia de Catalonha

Tèxte legit

Lo Congrès dels Deputats espanhòl ven d’aprovar lo projècte de lei d’amnestia que sa tòca es de metre lo ponch final a la repression judiciària contra quatre centenas de personas enseguidas per l’ensag d’independéncia de Catalonha. An votat favorablament per l’amnestia totes los partits politics franc del PP (drecha conservatritz nacionalista espanhòla), UPN e Coalicion Canària (partits de drecha regionalista) e Vox (neofaissista). Los deputats d’aquesta darrièra formacion an ensajat de boicotar la sesilha amb de crits e insultes. La presidenta de la region de Madrid, Isabel Díaz Ayuso (PP), a declarat que presentariá un recors per una supausada inconstitucionalitat.

Lo projècte de lei èra ja estat aprovat lo 14 de març mas deguèt anar puèi al Senat, coma o prevei la Constitucion espanhòla. Aquí lo Partit Popular (PP), qu’es radicalament contra aquela amnestia, i ten la majoritat absoluda e faguèt tot çò que poguèt per fin de retardar lo retorn de la lei al Congrès.

Desenant, la lei deu èsser publicada e la deuràn aplicar los jutges, e mai ajan manifestat lor desacòrdi. De fach, los magistrats an dos meses per prene de decisions suls cases que son concernits per aquela lei, e se calcula qu’entre 372 e 419 personas son victimas de la repression judiciària contra l’independentisme catalan. Per tant, se la lei s’aplica, los independentistas en exili coma Carles Puigdemont, Toni Comín o Marta Rovira poiràn tornar d'aicí a dos meses sens risc de preson. Cal, totun, çò que voldràn entreprene los jutges per o empachar.

Los deputats independentistas a Madrid de Junts e d’ÈRC an saludada l’aprobacion de la lei en afortissent qu’es pas un perdon espanhòl mas una victòria contra Espanha.

De seguir tanplan s’aquela amnestia salvarà Espanha d’una probabla condemnacion per la Cort Internacionala dels Dreches Umans.

 

 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article