Donald Trump es estat reconegut colpable de las 34 acusacions per las qualas èra inculpat, dont de falsificacions comptablas qu’assajavan de cobrir la temptativa illicita d’influenciar una eleccion presidenciala. La jurada, formada per dotze personas, s’acordèt sul verdicte a l’unanimitat après doas jornadas de deliberacions. Se determinèt qu’abans las eleccions de 2016, Trump aviá falsificats de registres per amagar de pagaments de 130&bnsp;000 dolars a una actritz de cinèma pornografic per que mantenguèsse en silenci una supausada relacion sexuala amb el.

Ara, lo jutge de la Cort suprèma de Nòva York, Juan Merchan, a previst de far venir publica la senténcia l’11 de julhet. Trump se deurà presentar al Departament de Libertat Provisòria de la vila de Nòva York per una entrevista sus sos antecedents, sa santat mentala e las circonstàncias de son afar.

Las cargas contra Trump son de delictes non violents, punibles d’una pena de preson estatala que pòt anar de 16 meses a 4 ans. Ça que la, los expèrts legals considèran improbable que Trump, dins sos 77 ans, siá encarcerat pr’amor qu’a un casièr judiciari verge.

Lo jutge Merchan poiriá doncas condemnar Trump a la libertat provisòria, e l’èx-president poiriá tanben èsser multat o se veire concedida la libertat condicionala.

Trump contunha d’èsser elegible per la presidéncia, pr’amor que la Constitucion dels Estats units empacha pas qu’un candidat condemnat per delicte se presente a las eleccions. Trump pòt encara far una apellacion sul verdicte dins un relambi de 30 jorns e presentar l’apellacion completa fins a sièis meses apuèi, çò que poiriá alongar lo procès delà l’eleccion del 5 de novembre.

Los sondatges mòstran que la condemnacion poiriá afectar leugièrament lo sosten a Trump. Un dels mai recents indica que lo 20% de sos partisans reconsiderarián de votar per el, e que lo 4% d’eles i renonciarián definitivament.

En mai d’aquel afar, Trump afronta tres autres procèsses penals, mas sa condemnacion a Nòva York afècta pas legalament aqueles autres afars. Trump s’es declarat non colpable en cadun d’eles.