Bandièra01 capçalera  1180x150: Novestivada

Actualitats

La calorassa en Índia arriba a de nivèls insuportables pels umans

Delà lo sud-èst asiatic, d’autres endreches qu’an patit de grèus calimasses a la prima son l’Orient Mejan, Mexic e Florida

| Rajat Gupta

Tèxte legit

La setmana passada, una èrsa de calor portèt en Índia de temperaturas recòrd insuportablas. Las temperaturas a Delhi se sarrèron dels 50oC dins qualques quartièrs. En consequéncia se barrèt d’escòlas del temps que lo mond que trabalhan en plen aire èran en perilh.

Qualques vilas d'Índia an enregistrat las temperaturas mai nautas de l'istòria, dont Rohtak amb 48,8 oC e Sirsa amb 49,5oC. A Delhi, las estacions meteorologicas an enregistrat de temperaturas de fins a 49,9oC. A Mungeshpur an raportat 52,9oC.

Aquelas temperaturas fan partida d’una èrsa de calor mai ampla qu’afècta una granda partida del sud-èst asiatic. Es una de multiplas èrsas de calor que i a pertot a causa d’una combinason de modèls meteorologics e de l’escalfament global causat pels umans. Aquela èrsa de calor a superat en qualques moments un lindal perilhós.

Los efièches de la calor sul còrs uman se mesuran per mejan de l’indici de temperatura al termomètre-glòbe molhat. Ongan, segon un rapòrt de The Washington Post, aquel indici es arribat als 38oC, en tot despassar lo lindal dels 32oC que met en perilh la subrevivéncia umana.

Delà lo sud-èst asiatic, d’autres endreches qu’an patit de grèvas caloradas en prima son l’Orient Mejan, Mexic e Florida.

 

Las temperaturas se poirián ongan moderar

 

Un dels principals factors climatics desestabilizants dins lo Mond entièr es lo fenomèn d’El Niño (que vòl dire en espanhòl “l’Enfant”, sosentendut “l’Enfant Jèsus”, pr’amor qu’apareis a l’entorn de Nadal). Es l’origina d’un corrent costièr sasonièr caud, long de Peró e de l’Eqüator, que provòca de temperaturas anormalament elevadas de l’aiga dins l’èst e lo sud de l’ocean Pacific; aquò afècta lo Mond entièr e entraïna de damatges en America del Sud, en Indonesia e en Austràlia. Lo fenomèn es explicat pel movement de rotacion de la Tèrra e lo desplaçament de las marèas de l’emisfèri nòrd a l’emisfèri sud. El Niño se manifèsta ciclicament en periòdes d’entre tres e uèch ans.

Ongan es previst que s’amendrisca dins los meses avendors, çò que poiriá enfin moderar las temperaturas globalas.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article