PastissaDura es un projècte que consistís a faire de vidèos sus TikTok ont doas equipas “las Gaufretas” (Neuletas) e “los Canelats” se lançan de desfises de pastissariá (que son mai o mens capitats).

Uèi, alara que los joves qu’aprenon l’occitan a l’escòla son de mai en mai nombroses e que son per la màger part connectats de longa als malhums socials, los contenguts digitals disponibles en aquesta lenga demòran plan rars . Lo pauc de contengut disponible pòt èsser vist coma un problèma, o almens una manca o un damatge. Per contrar aquò, l’Euroregion a lançat un concors: “L’occitan suls malhums socials”.  Aqueste concors a mantun objectiu: faire connéisser l’occitan als que lo parlan pas, porgir de contengut en ligam a las practicas culturalas de l’Euroregion als que lo parlan e d’un biais general assegurar la transmission de l’occitan d’un biais diferent.

Dempuèi la debuta de l’annada, la classa d’escolans de terminala en opcion occitan al licèu Ferdinand Foch de Rodés en Roergue avèm decidit de nos investir dins la realizacion d’una tièra de vidèos sus lo tèma qu’avèm causit ensems: los pastissons. Mai precisament los pastissons tradicionals de las regions concernidas per l’Euroregion: la region Occitània, Catalonha e las Balearas.

Mas perqué los pastissons? Pensam que la confeccion e la degustacion de pastissons es quicòm que parla a tot lo mond e qu’es prigondament ligat a las culturas regionalas. Parlar de pastissons tradicionals e partejar lor recèpta vòl tanben dire partejar lor istòria, la legenda qu’i es sovent ligada e las tradicions qu’acompanhan lor realizacion tradicionalament. Parlar de pastissons occitans es parlar de la cultura occitana, e la far viure.

Avèm degut far de recèrcas de recèptas e nos repartir los prètzfaches per cada vidèo: un escriviá lo punt istoric, un segond cosinava, un autre encara montava los vidèos…

Avèm creat nòstre compte pastissa.dura e avèm causit de difusar los nòstres vidèos sus TikTok. TikTok es a l’encòp una aisina de bon manejar, assegura una granda visibilitat cap als joves qu’i passan bravament de temps e subretot es ideal per los vidèos.

Per faire avançar nòstre projècte e per tocar lo mai de mond possible avèm fach mantuna mission de comunicacions. Avèm enregistrat un podcast amb Ràdio Albigés e Ràdio Air d’Autan, lo projècte pastissa.dura a fach l’objècte d’un reportatge dins l’emission Viure al pais amb France 3, e avèm confeccionadas d’afichas espandidas dins tot lo licèu e sus lo compte Instagram del licèu Foch de Rodés. Per nosautres es estat l’astre de faire descobrir al mai de mond possible la lenga qu’aprenèm dempuèi la mairala e aquò representa quicòm de fòrça important.

Tot aquel projecte necessitèt fòrça organizacion e mai encara de trabalh collectiu! Nos aurà permés de descobrir (o tornar descobrir) las recèptas tradicionalas de nòstra region e de las regions vesinas mas tamben de comprene las tradicions e las legendas que las an mantengudas vivas dempuèi fòrça temps.

Se volètz vosautres tanben descobrir lo resultat d’aquesta aventura e nos sosténer dins nòstra participacion al concors euroregional, venètz veire nòstres vidèos sus lo compte Tiktok: @Pastissa.Dura!

@pastissa.dura

Jornalet a una seccion especifica sus l’escòla occitana. Nos agradariá fòrça que las escòlas, que sián de Calandretas o d’escòlas bilingüas, poguèsson emplenar elas meteissas aquesta seccion amb de nòvas, e que los quites escolans las poguèsson redigir en explicar los faches que fan l’actualitat dins cada escòla: una excursion culturala, la vesita d’una personalitat, una fèsta populara amb los parents, una competicion esportiva, etcetèra. Evidentament, las fotografias, los enregistraments o los imatges de vidèo seràn tras que benvenguts, se n’i a.

Se cada escòla nos manda quatre o cinc nòvas per an serem plan contents e satisfaches. Pensam que pòt èsser un bon ponch d’amassada per la comunautat educativa occitana, una iniciativa interessanta pels escolans e un esplech de socializacion lingüistica per las familhas dels escolans.

Esperam de poder comptar amb lo vòstre sosten, e esperam que Jornalet serà una aisina utila per las escòlas occitanas. Mandatz-nos las vòstras nòvas a info@jor…