D’aquesta passa se debanan las Encontradas, rescontres departamentals d’escolans (mairala, primari e qualques collègis) qu’an pres part al projècte academic occitan dins l’acadèmia de Montpelhièr (alargat ongan a una participacion en Avairon).

Los recampaments se tenguèron a Mende (dimars 4 de junh) e Serinhan (dijòus 6) e seguiràn aquesta setmana a Vauvèrt (dimars 11) e Campendut (dijòus 13).

Lo projècte es bailejat per las conselhièras departamentalas pedagogicas d’occitan.

Lo vergièr de Zelí

Lo trabalh interdisciplinari de l’an mesclava lenga occitana, cants, danças, botanica, ecologia… Virava a l’entorn de l’òrt. A la rintrada, un libret (illustrat per Felip Atcher e editat per las Edicions de Cabardés) es ofèrt als mainatges per servir de basa als trabalhs. S’i ajusta puèi un CD de cants e de danças.

Aquí un resumit de l’istòria de l’an. Una drolleta Zelí ven de cambiar l’ostal e descobrís son novèl territòri. Trapa un parpalhòl que ven son amic e que li va presentar frucha e legums: peras, pomas, caquis que ne faràn confiment e codonhs, basa del codonhat. Astre: lo Pargue Natural del territòri organiza lo concors del jardin mai natural.

La dròlla decidís d’i prene part e va demandar l’ajuda de Daidièr, l’ortalièr de Cantacocut. que li balha de granas de lavanda, de rosèlas e d’ulhets. Zelí semena aquelas flors mellifèras quand reçaup la vesita de sa mairina que la manda cò de Clara l’ortalièra qu’a plantat de merinjanas, de pebrons e de pomas d’amor, e bastit d’abrics pels insèctes protectors. E la drolleta de bastir un abric per las catarinetas! Zelí va rescontrar Roland, lo païsan de Cantalausa, que li presenta los aucèls: de blavetas, de mèrles e de barbarosses. Lo bartàs es un refugi per l’eiriç, la cagaraula e la musaranha. E òp, Zelí ajusta a son òrt un randal de sambucs, garrabièrs e romècs. Son vergièr es ara un exemple de biodiversitat. Pel concors, qui sap? “De las gotas d’aiga, se fan los rius!”

Al programa de las jornadas

De matin, los escolans arriban, plan sovent en carri. Fòrça an cargat lo camisòt de l’an que repren la cobèrta del libret. Un moment d’acuèlh dançarèl es previst. Qualques classas presentan lor realizacion de l’an: ongan, s’agissiá de faire d’ostalariás pels insèctes.

Aprèp, las classas an dreit a tres animacions de tres quarts d’ora. Lo Teatre de las Originas s’es encargat de metre en scèna Lo vergièr de Zelí. Coma los mainatges coneisson l’istòria, aquò permet un espectacle interactiu e participatiu.

Los autres talhièrs pòdon èsser l’escota de contaires, de temps de danças, d’escota de musicaires, de participacion a d’ajustas lingüisticas (responsas de balhar a de questionaris).

D’artistas se produsisson suls quatre luòcs (Veronica Fiòl, Miriam Bafia, Alan Roch pels contaires; Castanha e Vinovèl per las danças; Jocelin Papon e Abdel Bouzbiba per la musica Arab’Òc) e s’ i ajustan d’intervenents locals (coma Los joglaires d’acordeon en Losera; Bobby lo contaire, los Golamas’K e los Caselòts en Erau; la Fanfara de Menerbés e Ives Seguièr en Aude, etc.).

Un darrièr recampament al ritme de las farandòlas e un espertinar (còca e chuc de frucha) pels enfants clavan la jornada. Cadun torna partir amb son paquet de sovenirs e de moments gaujoses.

Aqueles rescontres son importants per far veire als mainatges que son pas solets dins lor classa a faire d’occitan; es important que rescontren d’artistas, d’intervenents divèrses… per permetre la dobertura sus la vida vidanta.

Cal saludar lo trabalh de las organizairas (Fabiana Albèrt per Aude; Celina Serva per Erau; Aurelia Dieudonné per Gard; Joèla Rossinhòl per Losera) que devon capitar l’afar en prenent en compte la cèrca complicada de las subvencions, los reglaments demultiplicats de las mesuras de seguretat, lo còst de mai en mai elevat dels transpòrts, s’es pas amb la calor o amb la pluèja! Mas lo vam, la volontat, lo biais e lo saupre-faire permeton de subrepassar los obstacles!

D’autres rescontres

Plan d’autras iniciativas son presas de rescontres d’escolans. Citarem:

• lo rescontre dels collegians que seguisson de corses d’occitan de l’academia de Tolosa que se tenguèt dins la Ciutat Mondina lo diluns 6 e lo dimars 7 de mai a l’iniciativa del CRÈO Tolosa

• lo debanament de la Passejada Literària de las calandretas de Lengadòc: mai de 600 mainatges recampats a l’Aigassieral de Narbona lo 28 de mai aprèp un trabalh de lecturas menat long de l’an.

• a Carcassona, aqueste dimarç 18 de junh, se farà lo bilanç d’una accion educativa comuna menada per la calandreta locala, las classas bilingüas del public de l’escòla Berthelot e lo collègi del Bastion (ont se ten l’ensenhament bilingüe).

• …

Jornalet a una seccion especifica sus l’escòla occitana. Nos agradariá fòrça que las escòlas, que sián de Calandretas o d’escòlas bilingüas, poguèsson emplenar elas meteissas aquesta seccion amb de nòvas, e que los quites escolans las poguèsson redigir en explicar los faches que fan l’actualitat dins cada escòla: una excursion culturala, la vesita d’una personalitat, una fèsta populara amb los parents, una competicion esportiva, etcetèra. Evidentament, las fotografias, los enregistraments o los imatges de vidèo seràn tras que benvenguts, se n’i a.

Se cada escòla nos manda quatre o cinc nòvas per an serem plan contents e satisfaches. Pensam que pòt èsser un bon ponch d’amassada per la comunautat educativa occitana, una iniciativa interessanta pels escolans e un esplech de socializacion lingüistica per las familhas dels escolans.

Esperam de poder comptar amb lo vòstre sosten, e esperam que Jornalet serà una aisina utila per las escòlas occitanas. Mandatz-nos las vòstras nòvas a info@jor…