Aqueste dissabte, a Wembley, se jogava la finala de l’edicion 2024 de la Cup: una oposicion de tria entre Wigan (ja 20 trofèus dins l’armari) e Warrington. Al quart d’ora de jòc, los Lops dobrisson la marca sus penalitat. Wigan replica sul pic per un ensag transformat e n’ajusta un autre sus sortida de mesclanha 5 minutas mai tard. 12-2 per Wigan a la pausa. A la 56a minuta, Farrel trauca la defensa de Warrington qu’acabarà mas tròp tard per marcar un ensag. Atal, Wigan ajusta un vint e unen trofèu amb la victòria 18-8.

Cò de las femeninas, St Helens es plan mai fòrt que Leeds: 22-0. En 1895 Cup, competicion dels clubs de Championship e League One, larga victòria de Wakefield fàcia a Sheffield: 50-6.

L’omenatge a Rob Burrow

La finala de la Cup comencèt non pas a 16h mas a 16h07 en omenatge a Rob Burrow (7 coma son numèro de jogaire), lo mièg de mesclanha de legenda de Leeds mòrt a 41 ans de la malautiá de Charcot.

Èra d’un format de pòcha per un jogaire de rugbi: 1,65 m per 66 kg. Aviá signat a 17 ans cò dels Rinocèros. Amb lo club, emportèt 8 Superligas, 2 Cups, 3 World Cup Challenges, e portèt 18 còps lo malhòt de la Ròsa.

StateofOrigine: un Queensland impressionnant

Aqueste dimècres 5 de junh, se disputava a Sydney la primièra confrontacion de las tres de l’an de l’State of Origine. La partida virèt a l’avantatge de Queensland que se trapèt en superioritat numerica tre la setena minuta: l’arbitre sortissiá lo carton roge pel centre Suaali, autor d’un placatge espatla endavant qu’assuquèt l’arrièr Rice Walsh.

A la pausa, Queensland menava 20-6. Los Blaus tornèron determinats, marquèron un ensag abans que Queensland tornèsse prene la direccion de la partida per s’impausar 38-10, en signant 6 ensages. Rendètz-vos a Melbourne per la segonda partida lo 26 de junh.

Dijòus 6, Queensland ganhèt la partida femenina a Newcastle: 11-10, mas lo trofèu de l’an es per Nòva Galas del Sud qu’aviá ganhada la primièra partida: 22-12

Sèt partidas èran al programa de la quatorzena jornada d’NRL. Divendres, los Dragons foguèron sens pietat pels Tigres que puntan ara en coa de classament: victòria 56-14. Dissabte, tres victòrias al defòra: los Lapinons tornan puntar las aurelhas en ganhant cò dels Titans 46-12, los neozelandeses van batre los Vaquièrs 42-12 e Cronulla confirma sa primièra plaça amb una victòria cò dels Cavals Fòls (22-12). Dimenge, foguèt mai classic amb las victòrias de Penrith fàcia a Manly 32-22 malgrat los 4 ensages de l’alièr Talau. Melbourne pren la primièra plaça del classament mercé a sa victòria fàcia a Newcastle 36-28.

Fàcia als Leopards

Aqueste dissabte 15, a Brutus, los Dragons reçaupràn los Leopards de Leigh. Los sostens comptan plan sus una victòria catalana, mas tanben sus un jòc mai dobèrt. Es important que los jogaires pensen a… jogar e non pas a lor destinacion per l’an que ven alara que se sap ja que Tom Davies, Tom Johnstone e Jordan Abdull tornaràn prene lo camin d’Anglatèrra alara que lo pilar Jordan Dezzaria signa per las sasons 2025 e 2026.

Tolosa per encadenar

Aqueste dissabte 15, en Championship, Tolosa reçauprà Doncaster.

Ernèst Wallon prepara la jornada del dissabte 29 de junh. Tres partidas seràn de seguir: los rescontres femenin e masculin entre Anglatèrra e França e la partida Tolosa-Featherstone.