D’aquesta passa, los Dragons catalans ofrisson un temps de pausa als cronicaires esportius quand, d’una partida a l’autra, pòdon reprene los meteisses arguments: bona defensa, jòc estequit, manca d’animacion ofensiva, jòc al pè previsible, incapacitat de marcar d’ensages…

Alara que 1500 sostens de Leigh avián fait lo desplaçament en tèrra catalana, Artús Morgue dobriguèt la marca amb una penalitat. Los angleses egalizèron abans un ensag en fòrça: a la pausa, 8-2 pel Leigh. Dins lo segond temps, los Leopards ajustèton una penalitat e contrèron las estèrlas atacas localas per ganhar 10-2.

Los Sang e Aur demòran en seisena posicion, mas seriá ora de tornar anar de l’abans tre aqueste dissabte 22 de junh amb la recepcion d’Huddersfield, per un revenge del quart de finala de la Cup.

Tres autres clubs an ganhat al defòra: Wigan a Castleford (10-8), Salford a Warrington (25-12) e St Helens a Londres (52-6) alara que las formacions d’Hull ganhavan a domicili: Hull KR fàcia a Huddersfield 32-6 e Hull FC fàcia a Leeds 18-10.

Championship: cavalièr sol del Tolosa Olimpic

En Championship, lo Tolosa Olimpic signa una cinquena victòria en seguida en ganhant 52-0 fàcia a Doncaster.

Aqueste dissabte 22 de junh, los occitans, actualament 5ns al classament, aniràn afrontar lo 6n Bradford.

XIII-cadieral: tròp fòrts, los Andidracs !

Aqueste dimenge, se jogavan las finalas dels campionats de XIII-cadieral a Cabestany.

En Elèit 2, l’esquipa dels Andidracs domina Tolon: 72-8. La finala d’Elèit 1 opausava l’esquipa primièra dels Andidracs als Pandas montalbaneses. Aquestes opausèron una brava resisténcia, mas s’inclinèron 36-22.

NRL: lo campionat va son tren

En Austràlia, la quinzena jornada del campionat vei cinc formacions ganhar al defòra: los Dalfins cò de las Làmias (30-28), los Vaquièrs a Canberra (34-16), Melbourne en Nòva Zelanda (38-24), los Polets cò de las Anguialas (28-18) e las Pantèras de Penrith a Newcastle (26-18).

Demorèron mèstres a l’ostal: los Lapinons fàcia als Cavals Fòls (22-12), los Tigres fàcia als Titans (18-10) e Manly fàcia als Dragons (30-14).