Bandièra01 capçalera  1180x150: Novestivada

Actualitats

Israèl utiliza un trabuc medieval per lançar de bòlas de fuòc sus Liban

Una scèna surrealista, digna dels tempses medievals, foguèt fa gaire filmada a la frontièra entre Israèl e Liban, mostrant una unitat de las Fòrças de Defensa d’Israèl (FDI) a utilizar una maquina de contrapés per lançar de bòlas de fuòc

Israèl utiliza un trabuc medieval per lançar de bòlas de fuòc sus Liban
Israèl utiliza un trabuc medieval per lançar de bòlas de fuòc sus Liban

Tèxte legit

Dins un contèxt militar dominat per de tecnologias avançadas talas coma los radars, drònes e missils teleguidats, veire de soldats israelians a utilizar una sòrta de catapulta a de qué susprene. Pasmens, l’armada israeliana a explicat que s’agissiá d’una iniciativa autonòma d’una unitat locala que susvelha la termièra amb Liban per prevenir las atacas del grop islamic Hizbullah, çò rapòrta Fanpage. Lo clip, lèu vengut viral suls rets socials, a suscitat de nombrosas especulacions sus las rasons d’aquel gèst inabitual.

Dins lo vidèo, s’apercep almens sièis soldats qu’entorneja una maquina semblabla a un trabuc medieval, sovent utilizat un còp èra per assetjar de castèls o vilas. Aquel engenh, fabricat amb de pòstes de fusta montats sus un carreton de metal, lança de bòlas de fuòc, recordant aital las tecnicas de sètge ancianas. La scèna se teniá près d’una paret bèla de betum que servissiá de barrièra de proteccion.

L’interès suscitat per aquela scèna a conduch a divèrsas teorias, de la penúria de mejans, ja massissament engatjats a Gaza, a la manca de municions. Pasmens, las FDI an precisat a la cadena publica israeliana Kan que se tractava simplament d’una responsa locala a una situacion immediata, e non d’una novèla estrategia de combat.

L’accion remonta a qualques setmanas e aviá per mira d’incendiar lo sosbòsc del sud de Liban ont, segon los israelians, l’Hizbullah s’amagariá per preparar d’atacas contra lo nòrd d’Israèl. Segon lo jornal israelian Maariv, la catapulta es estada creada per la brigada de resèrva Carmeli per desgatjar la zòna delà la frontièra, facultant aital la deteccion dels militants de l’Hizbullah.

Aquela iniciativa interven après d’atacas en provenença de Liban que provoquèron d’importants incendis dins lo nòrd d’Israèl e d’evacuacions. Los afrontaments dins aquela region frontalièra an aumentat aqueste mes, malgrat que per ara demòren de febla intensitat.

 

 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article