Dempuèi la debuta de l’annada, los escolans de las 9 seccions bilingüas de las escòlas del departament de Tarn (Albigés) trabalhan sus un projècte comun: “Lo vergièr de Zelí”. Aqueste projècte es l’escasença de dinamizar l’ensenhament bilingüe dins lo departament. Aital se son tenguts de talhièrs dins d’escòlas a l’entorn d’aqueste projècte: dança, cant, cosina, jardinatge, etc.

Ara que la fin de l’annada se sarra, l’objectiu es de permetre als escolans bilingües de se rescontrar a l’escasença de recampaments que se tendràn a Sant Somplesi, la Vaur, Puòggoson e Albi a l’entorn, tornarmai, de talhièrs pedagogics.

Per ajudar a finançar aqueles recampaments, l’associacion ÒC-BI 81, qu’òbra per promòure lo bilingüisme dins l’ensenhament public, lança una tombòla en linha.

Podètz crompar de bilhetas e/o far un don a l’associacion que consagrarà l’integralitat de l’argent recebut a finançar los rescontres e especialament lo transpòrt dels escòlans mai alonhats.

La tòca es tanben de perennizar e renovelar aquesta accion per permetre d’ajudar a finançar de projèctes pedagogics en occitan dins lo departament.

De ganhar de lòts de la marca Macarèl a l’efígia de la crotz occitana: davantals, botelhas, tassas …

Podètz comandar las vòstras bilhetas abans lo tiratge del 24 de junh a partir del ligam seguent. Reçaupretz un e-mail per confirmar la crompa puèi, en seguida, un corric d’ÒC-BI 81 per vos donar los vòstres numèros de bilhetas.

Mercés per vòstra participacion a la reüssida d’aqueste projècte !

https://www.helloasso.com/associations/oc-bi-81/evenements/tombola-en-ligne

Jornalet a una seccion especifica sus l’escòla occitana. Nos agradariá fòrça que las escòlas, que sián de Calandretas o d’escòlas bilingüas, poguèsson emplenar elas meteissas aquesta seccion amb de nòvas, e que los quites escolans las poguèsson redigir en explicar los faches que fan l’actualitat dins cada escòla: una excursion culturala, la vesita d’una personalitat, una fèsta populara amb los parents, una competicion esportiva, etcetèra. Evidentament, las fotografias, los enregistraments o los imatges de vidèo seràn tras que benvenguts, se n’i a.

Se cada escòla nos manda quatre o cinc nòvas per an serem plan contents e satisfaches. Pensam que pòt èsser un bon ponch d’amassada per la comunautat educativa occitana, una iniciativa interessanta pels escolans e un esplech de socializacion lingüistica per las familhas dels escolans.

Esperam de poder comptar amb lo vòstre sosten, e esperam que Jornalet serà una aisina utila per las escòlas occitanas. Mandatz-nos las vòstras nòvas a info@jor…