Bandièra01 capçalera  1180x150: Novestivada

Actualitats

Lo varatge d’un vaissèl de mai de 3000 ans demòstra la navigacion luènh de la costa pendent l’Edat de Bronze en Mediterranèa

Aquela trobalha istorica permet de melhor comprene las capacitats de navigacion dels marins de l’epòca

Lo vaissèl que data de mai de 3000 ans es estat retrobat, cargat d’una centena d’anfòras. Aqueles recipients èran utilizats per estocar de produches tals coma lo vin e l’òli d’oliva pendent l’Edat de Bronze
Lo vaissèl que data de mai de 3000 ans es estat retrobat, cargat d’una centena d’anfòras. Aqueles recipients èran utilizats per estocar de produches tals coma lo vin e l’òli d’oliva pendent l’Edat de Bronze | AFP

Tèxte legit

Una descobèrta excepcionala se ven de far al larg de las còstas nòrd d’Israèl: lo varatge d’un vaissèl que data de mai de 3000 ans es estat retrobat, cargat d’una centena d’anfòras, çò rapòrta Sud-Ouest. Aquela trobalha istorica, anonciada per l’autoritat israeliana de las antiquitats, permet de melhor comprene las capacitats de navigacion dels marins de l’epòca.

Lo varatge foguèt descobèrt arunan, a 90 quilomètres de las còstas del nòrd d’Israèl e a mai de 1500 mètres de prigondor, per la societat energetica Energean, e revelèt un cargament compausat de centenas d’anfòras. Aqueles recipients èran utilizats per estocar de produches tals coma lo vin e l’òli d’oliva pendent l’Edat de Bronze.

Jacob Sharvit, cap de l’unitat maritima de l’autoritat de las antiquitats, a indicat que la nau s’èra probablament aprigondida a causa d’una tempèsta o d’una ataca de piratas, un dangièr corrent a la fin de l’Edat de Bronze. Lo varatge, del sègle XIV o XIII abans nòstra èra, pròva que los ancians marins podián navigar en nauta mar sens veire la còsta, probablament en se servissent de las estelas e del solelh per se localizar.

Aquela descobèrta, qualificada de “sensacionala” pels cercaires d’Energean, serà lèu partejada amb lo public.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article