Bandièra01 1180x150: Comuna de Tolosa

Actualitats

Bertrand Cantat poiriá èsser perseguit per forçar lo suicidi de sa femna

Bertrand Cantat
Bertrand Cantat | Bertrand Bosrédon

Lo cantaire bordalés d’expression francesa, Bertrand Cantat, poiriá èsser tornarmai perseguit per la justícia. Yael Mellul, una avocata parisenca especializada en violéncias conjugalas, vòl que lo cantaire siá perseguit pel suicidi de son anciana esposa, Krisztina Rády, en genièr de 2010. Mellul estima que la mòrt de la jove femna es ligada a de violéncias psicologicas exercidas per Cantat.


Krisztina Rády se suicidèt a Bordèu, dins lo domicili conjugal, lo 3 de genièr de 2010. L’avocata cèrca d’“alertar lo procuraire de la republica en li donant d’elements que li permetan de se saisir del dorsièr”. Al moment del suicidi Cantat sortissiá de preson, acusat de l’assassinat de l’actritz Marie Trintignant en 2003.
 
Yael Mellul se basa sul libre d’Stéphane Bouchet e Frédéric Vézar, L’Amour à mort(L’Amor a Mòrt), que foguèt publicat per L’Archipel en junh passat. Los jornalistas autors del libre i transcrivon un messatge telefonic inquietant de Krisztina Rády a sos parents en julhet de 2009. Semblava deprimida, descriviá la violéncia de Cantat e sa volontat de restar en vida. “En examinant plan atentivament aqueste messatge, vesèm que la sola sortida per ela es lo suicidi”, çò afirma Mellul.
 
L’avocata pensa a l’article 222-7 del Còde Penal francés que reprimís “las violéncias que menan a la mòrt” e vòl que se reconesca lo “suicidi forçat” per de violéncias psicologicas.
 
L’avocat de Bertrand Cantat, Aurélien Hamelle, soslinha que Mellul “es pas mandatada per degun, e non a pas cap de legitimitat ni cap de coneissença de l’afar o de las personas implicadas”. E Hamelle l’acusa d’agir solament “segon çò qu’a pogut legir dins la premsa”.
 
L’avocata parisenca afirma qu’agís en aqueste afar “coma militanta”, en representant pas degun, e mai se los parents de Rády avián ja evocat de violéncias del cantaire contra lor filha en una entrevista dins Paris Match en julhet de 2009. 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Eric
4.

Bertrand a tròup cantat ?

  • 1
  • 1
garric
3.

#1 Un òme violent segurament, un pervèrs es pas gaire probable qu'èra fòrça culpabilizat aprèp lo drama de Vilnius e qu'aguèt en preson la volontat de se sonhar. Es plan complicat de destriar çò que relèva d'una crisi conjugala de çò que relèva d'una violéncia cronica. Tròbi l'iniciativa d'aquela avocata fòrça malvenguda. Es a la familha de la victima d'endralhar una procedura aitala.

  • 7
  • 4
Terric Lausa Quilhan
2.

"contra" las femnas: lapsus clavis

  • 3
  • 0
Terric Lausa Quilhan
1.

Ne soi tot galinat d'escotar l'enregistrament de la paura Krizstina!

Al sieu procès per l'assassinat de Marie Trintignant, foguèt demostrat qu'aqueste òme es una persona extremament violenta: una violéncia permanenta, doblada d'explosions de violéncias esporadicas e tot aquò sus un fons de fòrta intelligéncia manipulatritz. Es una persona violenta coma las femnas.
Dit autrament, Bertrand Cantat, çò èra demostrat, es un pervers.

Es una pietat de veire que pas res a cambiat. Una autra femna es mòrta de per la siá violéncia.

E dire qu'ara que la mamà es mòrta, la drolleta viu sola amb un paire mai que dobtós...

  • 5
  • 1

Escriu un comentari sus aqueste article