Bandièra01 capçalera  1180x150: Novestivada

Actualitats

Lo castèth d’Esclinhac de cap a s’ahondrar

Lo darrèr castèth gascon, proprietat deus hrairs Bogdanoff dinc a la soa mort, demanda ua intervencion urgenta se ne volem pas véder sas roïnas

En 2034, lo castèth d’Esclinhac que celebrarà lo son millenari, mes lo son aviéner qu’ei incertan
En 2034, lo castèth d’Esclinhac que celebrarà lo son millenari, mes lo son aviéner qu’ei incertan | Pagina Facebook deu Castèth d'Esclinhac

Tèxte legit

Lo castèth d’Esclinhac, situat a Montfòrt (Lomanha), qu’ei en perilh, çò rapòrta France 3. Proprietat deus hrairs Bogdanoff desempuish 1986, aqueth monument istoric qu’ei uei a l’abandon, miaçant de s’ahondrar. Vielha de près d’un millenari, aquera bastissa n’a pas beneficiat de nat entertien despuish la soa aquisicion, entraïnant ua degradacion alarmanta.

Lo president de Sauvaguarda deu Patrimòni Gascon, Cédric Davant-Lannes, qu’obsèrva dab desespèr la deterioracion d’aquera jòia istorica. “Que plau dehens com dehòra”, ce deplora, en illustrant atau l’estat de deslabrament avançat. Las traus de la teulada que son tombadas, en provocant ua suscarga enòrma au quatau solèr, mentre que lo teit s’ei torçut devath lo pes. La DRAC (Direccion Regionau deus Ahars Culturaus) qu’a recentament inscrivut lo castèth sus la soa lista deus “edificis protegits en sofriment”, vaduda après l'esbonida de la nau de la glèisa de Montferran de Savés, en soslinhant los riscs d’ahonida imminents.

En 2034, lo castèth d’Esclignac que celebrarà lo son millenari, mes lo son aviéner qu’ei incertan. Aqueth darrèr castèth gascon de Gèrs, reconeisheder a las soas duas tors, brèument aubergatge deu celèbre D’Artanhan, qu’ei secutat per l’abandon. La capèra interiora que demora enqüèra sagrada, e abriga ua campana istorica, ua de las raras a aver suberviscut a las campanhas de honuda de Napoleon.

Uei, la succession deu castèth n’ei tostemps pas reglada, e tota intervencion qu’ei complicada. “Sonque entà la teulada, que calerén 5 milions d’èuros”, ce estima Davant-Lannes. Qu’apèra la DRAC a interviéner en vertut d’ua lei qui permet la soa accion en cas de defalhiment deus proprietaris, e qu’a tanben ensajat de demandar ua ajuda financèra a la fondacion Bern.

Lo sòrt deu castèth d’Esclinhac rèsta en suspens, mes l’urgéncia d’ua intervencion entà sauvar aqueth simbèu istoric gascon ne saberé pas estar mei insistenta.

 


Àudio generat automaticament per votz.eu

 

 

Articles relacionats

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article