Bandièra01 capçalera  1180x150: Novestivada

Actualitats

L’asteroïde Bennu revèla los ingredients originals del Sistèma Solar

Los primièrs estudis dels escapolons preses a l’asteroïde per la mission OSIRIS-REx mòstran de compausants que suggerisson que poiriá èsser sortit d’un ancian mond oceanic

La mission OSIRIS-REx, lançada lo 8 de setembre de 2016 e dirigida per l’Universitat d’Arizòna, a permés de reculhir un escapolon de 121,6 gramas de l’asteroïde Bennu, que tornèt sus Tèrra lo 24 de setembre de 2023
La mission OSIRIS-REx, lançada lo 8 de setembre de 2016 e dirigida per l’Universitat d’Arizòna, a permés de reculhir un escapolon de 121,6 gramas de l’asteroïde Bennu, que tornèt sus Tèrra lo 24 de setembre de 2023 | NASA

L’asteroïde Bennu, estudiat per la mission OSIRIS-REx, a desvelat de suspresas inesperadas gràcias a l’analisi dels escapolons de ròcas e de poscas raportats sus Tèrra. Segon un estudi publicat fa gaire per l’Universitat d’Arizòna, aqueles escapolons contenon d’ingredients primordials del sistèma solar, sustot de carbòni, d’azòt e de compausants organics essencials a la vida. De faiçon susprenenta, de fosfats de sòdi e de magnèsi i son tanben estats descobèrts, çò que suggerís que Bennu poiriá èsser sortit d’un ancian mond oceanic primitiu.

La mission OSIRIS-REx, lançada lo 8 de setembre de 2016 e dirigida per l’Universitat d’Arizòna, a permés de reculhir un escapolon de 121,6 gramas de l’asteroïde Bennu, que tornèt sus Tèrra lo 24 de setembre de 2023. Aquel prelevament constituís la primièra mission americana de retorn d’escapolons d’asteroïdes. Dante Lauretta, cercaire màger de la mission, a soslinhat l’importància d’aquela descobèrta per respondre a las questions sul sistèma solar primitiu e sus la formacion de la Tèrra coma planeta abitabla.

L’analisi a revelat una composicion rica en minerals argeloses, sustot en serpentina, similara a las ròcas trobadas dins las dorsalas semioceanicas sus Tèrra, ont l’aiga de mar interagís amb lo mantèl terrèstre. Aquela interaccion produtz de minerals variats, e mai de carbonats e d’oxids de fèrre. La descobèrta inesperada de fosfats solubles dins l’aiga, crucials per la bioquimia terrèstra, a suscitat un interès bèl. De fosfats similars foguèron trobats dins l’asteroïde Ryugu per la mission japonesa Hayabusa 2, mas los de Bennu se distinguisson per l’abséncia d’inclusions e la talha excepcionala de lors grans.

Malgrat los signes d’una istòria aqüatica, Bennu demòra un asteroïde quimicament primitiu, amb de proporcions elementàrias parièras a las del Solelh, çò que permet d’entreveire los primièrs jorns del Sistèma Solar, fa mai de 4,5 miliards d’annadas. Los escapolons, non alterats dempuèi lor formacion, son un tresaur de materials extraterrèstres pels scientifics.

Las analisis futuras per de laboratòris del Mond entièr prometon de novèlas descobèrtas suls procèsses de formacion del Sistèma Solar e  sus la quimia prebiotica que menèt a l’aparicion de la vida sus la planeta Tèrra. Coma o a declarat Harold Connolly, coautor de l’estudi, “los escapolons de Bennu son de pèiras extraterrèstras d’una beutat pivelaira, ofrissent d’indicis precioses sus l’origina e l’evolucion de las planetas similaras a la Tèrra”.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article