Bandièra01 capçalera  1180x150: Novestivada

Actualitats

Era Val d’Aran arreconeishuda coma resèrva dera biosfèra pera UNÈSCO

Er organisme internacionau a destacat eth patrimòni païsatgistic, era rica cultura e era lengua occitana

Era sindica d’Aran a participat ena ceremònia d’autrejament en Agadir (Marròc) pendent era 36u edicion deth Conselh Internacionau de Coordinacion dera UNESCO tath programa “Òme e biosfèra”
Era sindica d’Aran a participat ena ceremònia d’autrejament en Agadir (Marròc) pendent era 36u edicion deth Conselh Internacionau de Coordinacion dera UNESCO tath programa “Òme e biosfèra” | Conselh Generau d'Aran

Diuendres passat, era UNÈSCO arreconeishec era Val d’Aran coma resèrva dera biosfèra en ua ceremònia tenguda en Agadir, en Marròc. Er organisme internacionau destaca non sonque eth patrimòni païsatgistic deth país, mès tanben era sua rica cultura e era lengua occitana.

Eth Conselh Generau d’Aran presentèc era candidatura en 2021 damb er objectiu d’adaptar era val as conseqüéncies deth cambiament climatic. Era proposicion includís era transicion enà un avier mens depenent deth torisme massís, en tot remercar era sostenibilitat, era innovacion tecnologica e era interconnectivitat enes societats de montanha.

Era distincion de resèrva dera biosfèra arreconeish territòris que cèrquen d’armonizar era conservacion dera diuersitat biologica e culturau damb eth desvolopament economic e sociau a trauès dera interaccion des persones damb era natura. Segons era UNÈSCO, aguestes zònes “apòrten solucions locaus a problèmes mondiaus”.

Era Val d’Aran ven eth ueitau lòc occitan que ven resèrva dera biosfèra dera UNÈSCO dempús de Camarga, Cevenes, es gòrges de Gardon, Ventor, Leberon, Vísol e eth bacin de Dordonha.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article