Pendent una setmana d’abrial, los liceans de primièra occitan del licèu Foch a Rodés participèron a la creacion d’un concèrt de reggae jove public en occitan. Amb l’ajuda dels membres del grop Humpty Dumpty (un duo musical Yellow et Benezet que fan de cançons de reggae en occitan pels enfants) e jos la supervision de lor ensenhaire Gautièr Couffin, passèron una setmana en residéncia de creacion artistica dins de condicions professionalas.

Del 2 al 6 d’abrial de 2024, los liceans de classa de primièra occitan del licèu public Ferdinand Foch de Rodés anèron al Club (un luòc de produccion e de creacion de musica amb de salas de concèrts a Rodés), dins l’encastre del projècte "Occitan Reggae Trad". La tòca de la setmana èra simpla: crear un espectacle, o un "pestacle" coma dirián Yellow e Benezet, per un public de 6 a 10 ans, e lo presentar a unes 200 enfants. Un biais original de faire viure l’occitan entre las generacions.

Per menar aquel projècte, Yellow e Benezet venguèron una jornada al licèu per explicar çò qu’es lo reggae e cossí pausar un tèxte sus un son reggae. Tanben, los liceans faguèron un long trabalh abans aquela residéncia. Efectuèron de recèrcas de musica sul sit "Occitan Aveyron", ont podèm trobar d’enregistraments de cançons cantadas per de personas que parlan la lenga: de collectatges del mond de las generacions anterioras. Cada licean causiguèt de cançons e cerquèt tanben de riddims (çò es de tròçes de musica reggae sens paraulas).

Pendent 4 jorns enfin, del 2 al 5 d’abrial, trabalhèron dins lo club en totala immersion. Se multipliquèt los trabalhs e obradors: cant, coregrafia, mesa en commun, imaginacion, creacion... Descobriguèron aital las basas de la MAO (musica assistida per ordenador) per crear de riddims. Los liceans participèron a una sesilha de balança coma de professionals.

Se faguèt una repeticion generala dobèrta al public que lor permetèt de veire la relacion que se pòt aver amb lo public. A la fin de la setmana, faguèron la representacion (la vertadièra!) davant 200 escolans d’escòlas diferentas. Un moment d’una rara intensitat ont tres generacions se mesclèron, los pichons escolans, los liceans e los cantadors d’Humpty Dumpty, tot aquò sus de cançons d’un autre temps dins un rambalh digne d’un concèrt de Massilia.

Aprèp aqueste “pestacle”, doncas lo nom donat a la representacion per amusar los dròlles, los liceans foguèron fòrça suspreses per l’afogament dels enfants, que totes cantavan en occitan alara que solament 2 de las 5 escòlas èran d’escòlas bilinguas. La barrièra de la lenga existís pas mercés a la cultura musicala, lo biais ludic de Yellow e Benezet de menar l’occitan –biais que los liceans se n’apodèron largament son largament apoderat– permetèt a totes de dintrar dins la lenga pel jòc e pel plaser sens s’encombrar de prejutjats.

Aqueste projècte permetèt tanben als liceans de descobrir lo monde de l’espectacle viu, de s’avisar compte de tot lo trabalh necessari per montar un eveniment d’aquesta mena. Foguèt l’escasença de trabalhar la fisança en se e de se descobrir de competéncias desconegudas, de despassar la paur de se produire davant un public e mai encara davant un public de dròlles que son fòrça exigents.

Per fin de gardar una traça duradissa d’aqueste trabalh, l’espectacle foguèt filmat per Nils Martin de l’Institut Occitan d’Avairon,e se poirà agachar sus "Occitan Aveyron" ont lo vidèo de las cançons tradicionalas a la mòda reggae Humpty Dumpty costejaràn los vidèos de collectatges.

Los liceans acabèron lor setmana amb lo sentiment d’aver capitat lor objectiu, los enfants èran fòrça contents, avián passat un polit aprèp-dinnar. Avián descobèrt una partida del patrimòni oral occitan e o presavan fòrça. Aquel patrimòni tant important a lors uèlhs (cèrts liceans an retrobat de testimoniatges de lors aujòls sus "Occitan Aveyron") l’an fach viure e l’an difusat a lor torn. Es d’aqueste biais tanben que uèi la cultura occitana se transmet e se parteja entre generacions.

Jornalet a una seccion especifica sus l’escòla occitana. Nos agradariá fòrça que las escòlas, que sián de Calandretas o d’escòlas bilingüas, poguèsson emplenar elas meteissas aquesta seccion amb de nòvas, e que los quites escolans las poguèsson redigir en explicar los faches que fan l’actualitat dins cada escòla: una excursion culturala, la vesita d’una personalitat, una fèsta populara amb los parents, una competicion esportiva, etcetèra. Evidentament, las fotografias, los enregistraments o los imatges de vidèo seràn tras que benvenguts, se n’i a.

Se cada escòla nos manda quatre o cinc nòvas per an serem plan contents e satisfaches. Pensam que pòt èsser un bon ponch d’amassada per la comunautat educativa occitana, una iniciativa interessanta pels escolans e un esplech de socializacion lingüistica per las familhas dels escolans.

Esperam de poder comptar amb lo vòstre sosten, e esperam que Jornalet serà una aisina utila per las escòlas occitanas. Mandatz-nos las vòstras nòvas a info@jor…