Dimars 2 de julh, los U19 franceses rencontravan los angleses a Warrington. Los Blaus menavan 18-12 a la pausa. Portavan l’avantatge a 36-18, mas los locals acceleravan per tornar a egalitat e passar un tombat a una minuta del tèrme. Sus la darrièra accion, just sus la còrna, un còp de pè de seguir se transformava en victòria dels Blaus: 40-37. De confirmar a la Copa d’Euròpa que se va debanar en Serbia.

Victòria al punt en aur pels Dragons

Dissabte, los catalans jogavan a Hull KR. Èra l’ora del quart de finala de l’Èuro de fotbòl Anglatèrra-Soïssa mas las tribunes èran comolas. Alrix Dacosta i anava d’un ensag personal. Tèo Fages traucava la defensa locala e mandava Johnstone entre los pals. Amb las transformacions e una penalitat d’Artús Morgue, los catalans menavan 14-0 a la pausa. Fisèls a una marrida costuma, los Sang e Aur baissavan de ritme a la represa. Hull KR tornèt a egalitat. Caliá passar per las prolongacions. Dins lo primièr temps, Abdul e lo tustaire local manquèron lo tombat decisiu. Calguèt esperar la 87a minuta per que Tèo Fages marquèsse lo punt de la victòria catalana: 15-14.

Divendres, Castleford èra anat ganhar a Saint Helens 8-6! Victòrias aisidas de Warrington fàcia a Huddersfield 48-0 e de Wigan fàcia a Leigh 24-6. L’autra partida de dissabte anèt tanben fins al punt en aur: victòria de Leeds fàcia a Londres: 17-16.

Dimenge, Salford, que serà a Brutus aqueste dissabte, ganhèt contra Hull FC: 22-20.

NRL: 6 victòrias al defòra!

Cal creire que l’avantage del terren es pas mai qu’un mite!

Pel compte de la 18a jornada del campionat australian, 6 formacions an ganhat al defòra:

• los Lapinons a Parramatta 32-10

• los Titans a Cronulla 20-16

• Penrith cò dels Cavals Fòls 14-6

• Melbourne cò dels Tigres 60-28

• Manly cò dels Vaquièrs 21-20 (al punt en aur)

• Newcastle a Canberra 16-12

Sols, ganhèron a domicili los Dògols (13-12 fàcia als neozelandeses) e los Polets (42-12 fàcia als Dragons).