Bandièra01 1180x150: Comuna de Tolosa

Actualitats

crotz-tolosaCreated with Sketch.Gasconha

Aquitània: la situacion idrologica se milhora

Maugrat las plujas, lo nivèth de las napas demòra baish

 A Belin (Lana Gran), la Leira e los varats son plens
A Belin (Lana Gran), la Leira e los varats son plens | PJ Masdiset

Diluns passat, lo Sistèmi d'Informacion per la Gestion de las Aigas Josterranas d'Aquitània (SIGES Aquitània) a hèit publicas las soas observacions deus nivèths freatics d'Aquitània. Si l'estat de sequèir que coneishem dempuish mantun mes s'es drin atenuat, las tendèncias demòran totun dens una mejana baisha.


Maugrat las plujas, lo nivèth de las napas demòra baish
 
De hèit, per abriu de 2012, uèit de las nau napas libras observadas en Gironda presentan una haussa deu nivèth de la napa. Tres estacions (Latresna, Lo Tèmple, Lenton) se tròban quitament dessús lo nivèu mejan. Mès las autas demòran jos aquera mejana, e las estacions de Saucatz e de Peçac se situan a un nivèth hòrt baish, segon los comentaris deu SIGES.
 
La situacion es comparabla dens tota Aquitània. Las plujas excepcionalas d'abriu conjugadas a la honduda de la nèu, an tirat lo pais deu sequèir que menaçava, après un periòde long shens precipitacion. Hòra de las observacions de St Joan d'Ilhac e de Portèth (Lana Gran), que los nivèths baishan o se mantenen, totas las estacions mesuradas amuishan una augmentacion deu nivèth freatic. Sovent en demorar mei pròche de las observacions mei baishas, ça que la.
 
 
Lo debit deus flumes s'apròcha de la nòrma
 
Après un mes de març qualificat de critic per la Direccion Regionala de l'Environament, de l'Amainatjament e de l'Alotjament (DREAL), lo debit mejan deus flumes presenta uèi-lo-dia una situacion pròcha de la normala. Mercès a las precipitacions, excedentàrias per Aquitània en abriu, la situacion se milhora hòrt, atau. Passam d'un ecolament que plaçava 2012 demiei las annadas mei secas (d'aqueras que tornan cada cinc o dètz ans) a un ecolament plaçat a l'entorn de la mediana. Totun, la quantitat mendra de precipitacions dens lo parçan de Tolosa empacha Garona de tornar trobar son nivèth acostumat. Los relevats deu mes de mai, que seràn publicats a la debuta de junh, diurén confirmar aqueras observacions, efectuadas en partida avant la fin deu periòde de plujas.
 
 
 
Pèir-Joan Masdiset

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article