Bandièra01 capçalera  1180x150: Botiga

Actualitats

Lo papa a retirat lo poderós secretari d’estat vatican

Nomenarà lo nonci de Veneçuèla, Pietro Parolin, que remplaçarà Tarcisio Bertone

Tarcisio Bertone
Tarcisio Bertone
Lo papa Francés a demorat pas que cinc meses per retirar lo poderós secretari d’estat vatican, Tarcisio Bertone, segon d’informacions publicadas dissabte pels mèdias italians. L’òme elegit per remodelar la cúria romana dins aqueste nòu papat es Pietro Parolin, actual nonci de Veneçuèla e un dels òmes amb mai d’experiéncia e de prestigi diplomatic de la glèisa catolica.
 
Lo remplaçament s’anoncièt dissabte, mas la relèva efectiva se farà a la mitat d’octòbre per donar a Parolin pro de temps, per fin que prepare sa nòva estrategia a la segonda carga mai importanta de la glèisa catolica.
 
Bertone foguèt designat per Beneset XVI per remplaçar lo totpoderós Àngelo Sodano. A 79 ans e es estat lo centre de la polemica generada pel nomenat Vatileaks, que descapelèt de rets de corrupcion dins las nautas esfèras vaticanas.
 
Parolin es italian, nascut a Schiavon (Venèt), e a 58 ans. Foguèt ordenat capelan en 1980 e a fach sa carrièra diplomatica dins la glèisa. A tanben d’experiéncia a la cúria perque foguèt lo vicesecretari d’estat entre 2002 e 2009, en carga de las relacions amb los estats e dirigit per Angelo Sodano. Abans de far partida de la cúria èra estat nonci vatican en Nigèria e en Mexic. Beneset XVI l’encarguèt de missions mai que mai delicadas pendent son papat, coma la mission en Corèa del Nòrd, las convèrsas de patz del Pròche Orient, etc.
Pietro Parolin
Pietro Parolin

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article