Bandièra01 1180x150: País Invisible

Actualitats

De milièrs de catalans vòlon pas pagar de peatges en una campanha contra las autorotas pagadoiras





| @proupeatges

Dimenge 20 de mai es estat una cachavièlha per las autorotas catalanas. De milièrs de menaires, seguidors de la campanha #novullpagar (vòli pas pagar), circulèron sus las rotas pagadoiras, e en arribar al peatge, empleguèron la simpla formula “adissiatz, vòli pas pagar” per protestar contra un sistèma de peatges que considèran injust e abusiu. Èra la segonda granda convocacion dempuèi que comencèt aquela campanha d'un biais espontanèu, fa qualques setmanas, quand un usatgièr volguèt pas pagar e publiquèt la vidèo sus YouTube.




Lo metòde emplegat es simple. Segon la lei, s'un usatgièr de l'autorota ditz que vòl pas pagar cal li permetre lo passatge, malgrat que se pòt notar lo numèro de la siá placa d'immatriculacion per ensajar de corsar una denonciacion. Los trabalhadors dels peatges son pas cap d'autoritat publica, alavetz es illegal retenir lo veïcul al peatge perque l’entrepresa cometriá un delicte d'arrestacion illegala. I a, de mai, un apassionat debat public e juridic sus aquò: lo fach de pas pagar un peatge es un delicte o pas? Lo còdi de circulacion ditz pas res, quitament pas que siá un delicte. Benlèu podriá èsser un contenciós entre una entrepresa privada (l'autorota) e lo client (lo menaire). 



 

La campanha se debanèt ièr per totes Païses Catalans, exceptat la Catalonha del Nòrd. En Malhòrca, per exemple, se barrèt lo tunèl de Sóller davant l’avalanca d’usatgièrs que volguèron pas pagar lo peatge. Malgrat que las entrepresas afectadas an pas volgut precisar lo nombre de denonciacions qu'an mesas contra los transgressors, e an quitament minimizat l'impacte, es cèrt qu'an denonciat 16 000 menaires a la polícia tre que comencèt aquel movement. 





L’origina de la protèsta a dos aspèctes. Per un costat, fòrça catalans considèran que las autorotas catalanas son un monopòli inevitable per manca d’alternativa rotièra factibla e que los tempses de concession a las enterpresas que gerisson las autorotas son excessivament longs. Dins aquel sens, la majoritat d’autorotas an vist alongadas las siás concessions e dins totes los cases los sòus qu'an intrat an amortit de tròp los envestiments inicials e los beneficis de las entrepresas son arribats a de nivèls malaisits de comprene pel pòble. Per exemple, la bastison de l'autorota de Martorell, al près de Barcelona, agèt una inversion economica d’unes 15 milions d’èuros en 1968, mas las intradas son arribadas als 1168 milions d’èuros e la concession finaliza en 2021. Per se far a l'idèa de qual es la magnitud del negòci catalan d’autorotas i a una donada plan esclairanta: las entrepresas catalanas d’autorotas, que gerisson a l'entorn de 700 quilomètres, an de nivèls de beneficis similars a aquels de las entrepresas francesas d’autorotas, que gerisson 7000 quilomètres. 





Per un autre costat i a un aspècte politic plan remarcable. Los catalans an la percepcion, certificada per las estatisticas, qu'en Catalonha i a un excès d’autorotas de peatge del temps que dins lo rèsta d’Espanha las vias rapidas son normalament gratuitas. Las donadas o confirman: en Catalonha 67% de las autorotas son de peatge, en Espanha o son solament 20%. Dins lo cas de la comunitat autonòma de Madrid la comparason es mai embestianta: solament 3,40% de las vias rapidas son de peatge. Es per aquò qu'aquela campanha a un caire sobeiranista e la sostenon los partits independentistas.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Emili Deguens Lo Feugar
2.

Totjorn trapar de bonas rasons per voler pas pagar, aquò es tipicament espanhòl. An pas comprés que per poder investir e crear d'emplecs, caliá pas gardar los sòus per si meteis. Aprèp, se cal pas estonar que Espanha siá dins una mèrda negra.

  • 0
  • 2
Simeon
1.

Dins lo meme estile, i es l'autovia a Niça. Es la soleta autovia de contornament urban en França a èstre paganta. D'un temps a Escota (l'entrepresa que fa la gestion, aüra filiala de Vinci autoroutes) disíon que lo jorn que seríon arribats a devenir beneficiaris, la seccion de contornament devendria gràtis. Ò èra una justificacion coma aquò. Mas fifre, ren de tot. Calia ren escotar Escota...

E mai, se fasètz lo trajeit entra Ventimilha e Frejús sus 100 qms. pagaretz 5 peatges. A Ventimilha (frontièra), 'A Torbia, Niça-Sant Isidòro, Antíbol e Frejús-Lo Capítol. Es la caisha a cash per circular sus la "Còsta d'Azur".

  • 5
  • 0

Escriu un comentari sus aqueste article