Bandièra01 capçalera  1180x150: Novestivada

Actualitats

L’Assemblada nacionala francesa discutís cossí ratificar timidament la Carta Europèa de las Lengas

| Jerome Bon
Ièr comencèt a l’Assemblada Nacionala francesa la session publica sus la proposicion d’una lei constitucionala per ratificar la Carta Europèa de las Lengas Regionalas o Minoritàrias. Aquela carta, signada e ratificada per la majoritat dels païses europèus, a per tòca d’assegurar la proteccion de las lengas autoctònas e istoricas d’Euròpa, las que son minorizadas e en perilh de desaparicion, en tot garentir lo drech dels parlants d’emplegar lor lenga dins la vida privada e publica.
 
França la signèt en mai de 1999, mas un mes puèi, lo Conselh Constitucional considerèt qu’èra contrària a la constitucion perque l’emplec de las lengas mal nomenadas regionalas, dins la vida publica, seriá contrari a la règla segon la quala “La lenga de la Republica es lo francés” (coma o ditz l’article 2 de la constitucion).
 
Quinze ans puèi, se debat una proposicion de lei constitucionala per introduire dins la constitucion un article que permeta de ratificar la Carta. Pasmens, se cèrca tanben de completar aquela lei amb una declaracion per que França aja drech d’interpretar la Carta e son aplicacion, se la signa.
 
 

fffff  fffff
 
Henri Guaino: “lo francés es una lenga melhora, dificila, originala, logica, musicala…”

Lo deputat Henri Guaino, de l’UMP, faguèt un discors contra las lengas mal nomenadas regionalas, en defendent la superioritat e la supremacia de la lenga francesa. Guaino acusèt los deputats favorables a la Carta d’èsser de girondins e afirmèt: ”una França federala existirà pas”. Mai d'informacions sus Agence Bretagne Presse e sus Ouest-France.
 
     


 
_____

Forum Occitània ne fa un segument en dirècte per Twitter

Libération: Vers une (timide) reconnaissance des langues régionales

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Matieu Castel Marselha
12.

#10 A prepaus de mon intervencion sus Libé, faguèri pauc vò pron la mesma sus rue89. La discutida fuguèt longarassa amb un melanchonista acarnassit :
A la cinquena pagina dei comentaris :

http://rue89.nouvelobs.com/zapnet/2014/01/22/langues-regionales-quand-les-deputes-baragouinent-249280?page=1#comments-start

  • 2
  • 0
Tristan Gahús Sarlamaleicom
11.

#10 Completament d'acòrd. Le Fur, s'a plan començat la sesilha de ièr, es partit a un moment dins un deliri d'ont es pas sortit. Es clar que jòga un jòc dangieros, per el (aquò m'en foti) mas tanben, dins un efiech que risca d'èstre colateral, per la ratificacion de la carta coma per l'adopcion de tot projècte de lei pertocant las lengas regionalas (e aquò faria cagar). La catastròfa seria que la question venga un enjòc politic entre partits alara que justament foguèt fins ara pro transpartita.

Li cal reveire sa pausicion d'aqui dimarç, es una necessitat, me pensi, per que lo debat s'enfonce pas dins los trefons de la democracia a la francesa e s'enterre avant quina accion que sia. Tanben, esperam de veire qui i aurà en oposicion, Guaino la representèt ièr, serà pas forçadament lo cas dimarç.

  • 6
  • 0
Felip Martèl Montpelhier
10.

#9 Es Bechtel qu'es contra : es chevenementista, es a dire ren (tres deputats : la màger part dels chevenementistas son morts o an passat a l'FN coma PM Couteaux e lo pichon Philippot). Sens importància. E penso que en termes de resson dins l'opinion, vau mai aguer Guaino e lo gros Myard contra nautres que per. Mon inquietud : las coquetarias de Le Fur e autres, que voldrian que la question seguesse remania en comission, e que van aguer de mau a rompre amb lor fonccionament partidari : qué que sieie la question, totjorn votar contra lo Govèrn. Segonda inquietud : la participacion en sesilha, lo 28, e qu l'i serè per votar...
Remarca per tot lo mond : suus sits dels jornaus e revistas, la question es objecte de debats suus forums. L'i chal anar, senon es aquelos d'en fàcia que l''i van tenir l'empenta (de bonas intervencions coma la de sokolovic suu forum de Libé).

  • 7
  • 0
Tristan Gahús Sarlamaleicom
9.

#6 Una autra session parlamentària foguèt anonciada pel 28, es a dire dimarç que ven. Ensajarem de la comentar en dirècte sus Twitter, coma aquela. Ieu ensajarai d'i botar mai d'occitan, se pòdi. Ièr, malgrat l'ora tardiva e lo feble nombre de deputats presents (totjorn una vergonha), avèm començat de pausar las basas d'un fialat numeric conjunh de representents de lengas minoritàrias que pòt encara crèisser del temps que durarà lo debat.

Pel moment se campan las pausicions, es aqui que vesèm quals son per las lengas e quals son contra. E remarcaretz qu'es pas question de color politica, mas de personas e de corrents. Lo virulent e ultrà-drechier Henri Guaino foguèt daissat pel seu camp, notadament los còrses e los alsacians, e al dintre del PS, en gròssa majoritat per, se tròban qualques jacobins en passejada (n'avèm ausida una ièr), de susvelhar.

La carta es clarament un minimum, ne sèm totes conscients, mas un minimum vital al mens per poder, pel primièr còp, provocar lo debat public sus aquestas questions.

La politicalha ne parla, los mediàs començan de seguir. A nosaus d'aprofiechar de l'ocasion e de nos arrapar al debat amb nòstres arguments. Lo punt positiu de çò que se passa a l'Assemblada es que se los arguments "per" evoluisson e creisson, los arguments "contra" son totjorns los meteisses. Guaino, malgrat son discors longàs e sa viruléncia, remarcadas, a pas fach que de debitar la tièra de totes los poncius que sabia sul subjècte. Tot çò qu'avèm de far, es de recuperar son discors e d'argumentar, punt per punt, pacientament, dins l'opinion publica, de tant que durarà aquesta discutida "amont-naut".

I a de trabalh !

  • 8
  • 0
babasoquian Mascoïnat sud
8.

En lu Aups maritimes, me sembla que se a Niça per exemple lo cònsol Estrosi es per "la lenga e li tradicions nissardi" dins li fèstas comunali, a París en l'Assemblada nacionala es còntra la Carta europèa.... Pensi qu'es pas lo solet a pensar nacional tot en tolerar lo folclòre local.

  • 8
  • 0

Escriu un comentari sus aqueste article