Bandièra01 capçalera  1180x150: Botiga

Actualitats

crotz-tolosaCreated with Sketch.GasconhaVal d'Aran

Campanha d’Unitat d’Aran per revendicar la singularitat d’Aran en Catalonha

Francés Boya
Francés Boya

Unitat d’Aran a començat una seguida d’accions institucionalas per far respectar la singularitat d’Aran en Catalonha. Per contra, lo govèrn aranés ditz que las leis que se fan en Catalonha respèctan plan la singularitat e l’autogovèrn del país occitan.


Unitat d’Aran (UA) a començat aquesta setmana la campanha “Èm Aran! Ne vegueria, ne comarca”, per defendre e revendicar la singularitat del territòri aranés dins Catalonha. Lo secretari general d’UA, Francés Boya, planh que non se respècte la singularitat d’Aran dins la nòva Lei Catalana Dels Govèrns Locals, e anoncièt “ua seguida d’accions institucionaus entà hèr respectar aquera singularitat e autonomia d’Aran” en Catalonha. Boya se ditz inquiet pr’amor “que se parle coma serà Aran ena Catalonha idealizada quan serà independenta, mès ena Catalonha reau non se ten en compde era singularitat d’Aran”.
 
Al delà, lo senator aranés planguèt a Jornalet que las decisions del Parlament de Catalonha arriben impausadas en Aran, sens que se’n parle amb lo Conselh General d’Aran, “çò qu’an hèt damb eth decret dera Acadèmia”, qu’es venguda l’Institut d’Estudis Araneses.
 
De son costat, lo Sindic d’Aran, Carlos Barrera, a declarat a Jornalet qu’aquela campanha de protèsta a pas cap de sens. “Era lei de govèrns locaus respècte eth regim especiau d’Aran e, ath delà, aquera lei demorarà sens efèit quan eth Parlament aprovarà era naua Lei d’Aran que ditz qu’Aran non pòt èster includit en cap de division territoriau que non sigue era madeisha”.
 
Dins aquel sens, lo govèrn aranés nos a mandat la disposicion addicionala quatrena sus los govèrns locals que se referís a Aran (document çai jonch). Dins aquela redaccion podèm remarcar que se pren ben en compte lo regim especial d’Aran. Totun, “aquerò no mos excludís ne deth veguerial ne deth mapa comarcau”, çò planh Boya, que revendica per Aran un estatut similar al previst per l’Airal Metropolitan de Barcelona.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article