Bandièra01 capçalera  1180x150: Botiga

Actualitats

crotz-tolosaCreated with Sketch.GasconhaBearnSeuvestre

Teatre en Gasconha: los Comelodians qu’an adaptat Shakespeare

Los Comelodians sus l’empont de Saut de Navalhas
Los Comelodians sus l’empont de Saut de Navalhas | JJF

Per tocar un public dit “popular” en tot har víver la lenga occitana, arren de mélher que lo teatre. En Bearn, la tropa deus Comelodians qu’ic a muishat un còp de mei. 


Dab gran plaser qu’an tornat trobar sus l’empont la tropa deus Comelodians, dissabte 26 d’abriu a Saut de Navalhas. Los valents teatraires bearnés qui avèn jogat en abriu de 2013 la darrèra de Batsarra sus l’Acropòli, d’après Aristofanes, qu’an tribalhat aqueste còp ua adaptacion de Shakespeare. La Maria-Jò Hustaix-Etcheverry qu’a liurament adaptat The Taming of the Shrew, aquò’s a díser “La qui s’a trobat un mèste”. A shrew, en anglés, qu’es ua murgueta deu nas puntut, deu genre soritz de coda braca, mes tanben, au sens figurat, d’ua hemna impossibla, que ne pòden maserar, qui ne’s dèisha pas har e qui ditz, s’ac cau, las quate vertats au monde qui l’embèstian…
 
Per tiéner atau aqueth ròtle, que cau ua hemna de cap, ua hembla, com e disen deu costat de Sauvatèrra o d’Ortès, qui sii ua dauna. Per entrar dens aqueth personatge, qu’es necessària ua suberbèra santat sus l’empont. La Betty Deyres qu’ic a muishat per har pè cap aus òmis e sustot a son amorós, un marqués un chic liròi e mahutre (J.-Luc Despouys) qui a corrut lo Monde e benlèu Sagòrra e Magòrra… E sustot non pas deishà’s har per son pair, Sénher Cazala (René Labeyrie).
 
Un bèth capulat, aqueste gran industriau de Sauvatèrra, “sol fabricant de vertadèra lan deus Pirenèus”! Qu’a los pès au caud, que coneish lo prètz e la valor deu tribalh, e que sauneja d’un bèth maridatge per la soas duas hilhas, la Catarina donc e la Docina (Thérèse Higué), tota sosmetuda en aparéncia mes qui tomba amorosa pèga d’un ancian galant, l’inefable Nicolas Marriat.
 
Cinc autes Comelodians —dont lo Fernand Dauguet, valent fondador e animator teatrau deu larèr d’animacion populara de Saut de Navalhas dempuish un bon vintenat d’annadas— jògan lo ròtles segondaris mes tostemps dab justessa e estrambòrd.
 
 
Lenga saborosa
 
Per aquera navèra creacion, l’empontaire Alain Muñoz a causit la sobrietat deus decòrs: contràriament a Batsarra sus l’Acropòli, pas cap d’atruna o maneita, nat mòble, nada cadèira o pòrta. Tot que repausa suu jòc e sus la lenga saborosa de las replicas o deus monològs redigits per la Maria-Jò. Solide, l’autora qu’auré aimat e podut jogar lo ròtle de la Catarina mes, aquí, qu’a sabut trobar ua digna eretèira... Per la pèça prosmana, que’u calerà pensar a un personatge a la soa mesura.
 
Per aquera permèira en país de Seuvèstre que tòca Shalòssa a bisa de Bearn, lo monde deu vilatge e deus parçans vesins, landés o bearnés, qu’èran nombrós. E qu’èra un plaser d’escambiar, arron la pèça, au torn d’un petit nhac simpatic. Que cau encoratjar e har venir a vòste aqueths braves Comelodians qui ne cranhen pas de hicar endavant la nòsta cultura gascona que hèn vertadèirament víver capvath la soa lenga.
 
 
 
 
Joan Jacme Fénié
 
 
 
_____
Contacte: www.loscomelodians.fr o +33(0)5 59 67 50 92.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article