Bandièra01 1180x150: País Invisible

Actualitats

Espanha que demane ajuda a Euròpa entara banca

Era zòna èuro envisatja un plan d'ajuda d'enquia 100 milhards d'èuros

Espanha qu'a demanat auxili a Euròpa entà assanir era banca. Brusselles qu'aufrís ua linha de crèdit d'enquia 100 milhards d'èuros (100 000 milions), mès qu'impòse condicions as banques e ua supervision mès regulara des reformes estructuraus e deth compliment deth deficit. Eth Hons Monetari Internacionau (FMI) que monitorizarà tot eth procès. Eth ministre espanhòu d'economia, Luis de Guindos, non vò parlar de sauvament e ditz qu'es condicions afectaràn solament ath sistèma financèr.


Eth ministre espanhòu d'economia, Luis de Guindos, qu'a demandat ua ajuda a Euròpa d'enquia 100 milhards d'euros, ua quantitat mès nauta qu'era balhada a Irlanda e a Portugal. De Guindos a dit qu'"eth govèrn espanhòu demane finançament europèu entà poder recapitalizar es banques espanhòles que n'agen de besonh". De Guindos a dit qu'es condicions dera injeccion de sòs afectaràn solament ath sistèma financèr, e non cap ara politica economica. Es sòs qu'apòrte Euròpa anaràn entath Hons de Restructuracion Ordenada Bancària (FROB segontes es sigles en espanhòu) que serà qui tractarà damb es banques.
 
Quitament s'òm ei inquiet pes repercussions qu'aguest sauvament aurà sus era societat, eth ministre espanhòu a dit que "çò que se hè ei demanar un prèst entà auer ues entitats bancàries mès solvables e que poguen donar credit. Aguesta qu'ei era arrason de hèr aquerò. Non i pòt auer cap de recuperacion economica s'i a dobtes sus eth nivèu de rendabilitat des entitats [bancàries], pr'amor que non poderien dar credit as familhes e as enterpreses. Alavetz, era arrason ei qu'es entitats siguen solvables e donguen aqueth credit. Es condicions s'imposaràn sus es banques, e non sus era societat".
 
Eth president espanhòu, Mariano Rajoy, ei estat absent, e b'ei estat ath ministre d'economia de comunicar publicaments era decision.
 
Quauqui centenats de persones an protestat en Madrid. Eth sauvament as banques comportarà mès "retalhades" o reduccions budgetàries sociaus. Ath delà, eth hèt de sauvar era banca damb es sòs de toti non ei guaire popular. Entath 16 de junh s'an convocat mès protèstes en Madrid.




Ferriòl Macip

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Pirolet
1.

Lo Rajoy la foira lo ten, e pas la foira verbala, que s'amaga dels jornalistas per aver pas a respondre.

  • 2
  • 0

Escriu un comentari sus aqueste article