Las mapas de lamps son pas brica estranhas, los servicis meteorologics ofrisson de donadas sul ret. Ara, dos afogats de la meteorologia alemands, Tobias Volgnandt e Egon Wanke, decidiguèron de far una crida a la collaboracion dels internautas per bastir una mapa del Mond ont apareisson totas las descargas electricas a l’instant.
 
La mapa Blitzortung se pòt consultar per continents (a l’ora d’ara i a sustot de donadas d’Euròpa, d’Austràlia e de l’America del Nòrd) e, en mai d’indicar visualament las descargas, se marcan tanben amb de son.
 
A aquel ret collabòran de meteorològs amators de tot lo Mond: que pòrtan al sit Blitzortung las donadas de lors pròpris sensors de lamps. Cal dire que l’aparelh utilizat per la majoritat dels collaboradors es lo que fabriquèt lo quite Wanke en 2012, mai simple e mens car que los que i aviá alavetz al mercat.