Lo projècte del govèrn francés de fusionar Aquitània, Lemosin e Peitau-Charantas comencèt de se materializar diluns passat, quand s’amassèron los tres presidents regionals a Lemòtges. E mai se los presidents se preparan, en Lemosin emergisson de contestacions dins la societat civila.
Diluns passat s’amassèron a Lemòtges los tres presidents de las regions d’Aquitània, Lemosin e Peitau-Charantas per parlar de la nòva region administrativa francesa que naisserà de lor fusion. Lo president de Lemosin exprimiguèt sas resèrvas sus aquela fusion, segon çò que raportèt Libération.
“Consolidar e amplificar lo nòstre lideratge”, es aquò que cèrca dins la nòva region Jean-François Macaire, president de Peitau-Charantas. “Qu’es ua oportunitat”, çò diguèt Alain Rousset, president d’Aquitània, que segon el la fusion a “un potenciau enòrme”. Mas lo president de Lemosin, Jean-Paul Denanot, qu’es tanben eurodeputat, se mostrèt pas tant entosiasta amb la reforma regionala e i vei “una descentralizacion a l’envèrs”.
De fach, lo 17 de novembre passat, l’èx-president de Lemosin, Robert Savy, demandèt a François Hollande que daissèsse “a Lemosin lo drech de s’administrar liurament”, dins una crida cosignada per 17 èx-conselhièrs regionals. “Los lemosins seràn un pauc pus luenh daus centres de decision e lors decididors lor seràn un pauc pus estrangiers”.
En junh, la Coordinacion Occitana de Lemosin aviá lançat una peticion en linha per protestar contra la decision de restacar lo país occitan a una region novèla amb Peitau-Charantas e lo Centre (segon l’anciana version del projècte de fusion de las regions). Seguiguèron d’autras iniciativas coma “Tòches pas mon Lemosin” e los planhs d’autres collectius. Dins aquel sens l’associacion 55 Ciutadans per Lemòtges planh que non i aja “gran de debat permetent aus ciutadans de s’exprimir sus quela mesura que nos sembla grèva, perque prevei la desparicion de Lemosin”.
E mai s’aquela contestacion politica e sociala a pas la fòrça de las protèstas en Bretanha o Alsàcia, sembla qu’es a emergir e Libération n’a publicat una analisi.
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
#4 "Ei ua colonizacion maximau." Qu'ac sabes tu, quin se reparteishen las ressorsas ?
#3 L'objectiu de l'occitanisme es pas justament de redusir lo nombre de regions dins lo miegjorn de França per n'arribar a n'una soleta amb lo maximum d'autonomia avans una eventuala independéncia ?
Ne sèi pas d'on tiratz aquò. N'ei pas briga lo contiengut deu projècte d'autonomia presentat per VVAP en 1978 o 1979. Que seré plan se podètz citar referéncias.
#3 Ara ora de repartir recorsi, se i a X èuros per region, i aurà 4X en sud e 8X en nòrd. Ei ua colonizacion maximau.
#2 Compreni pas vòstre comentari... L'objectiu de l'occitanisme es pas justament de redusir lo nombre de regions dins lo miegjorn de França per n'arribar a n'una soleta amb lo maximum d'autonomia avans una eventuala independéncia ?
Conoissètz la dicha "diviser pour mieux régner" ?
4 regions gigantassas au sud, 8 de dimensions (un pauc) mai umanas au nord.
Sem totjorn un territori colonisat
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari