Bandièra01 capçalera  1180x150: Novestivada

Actualitats

crotz-tolosaCreated with Sketch.LengadòcLengadòc NautTolosan

Teatre occitan au hestenau Théâtres d’Hivers

Lo hestenau de teatre amator de Tolosa va hestejar ongan son dètz e setau anniversari

Presenta quauques 29 pèças dens 14 lòcs diferents de la vila. La programacion es ambiciosa, au mieg de las òbras presentadas podèm citar Los jogaires de Nikolai Gogol, Cau qu’ua pòrta siá dobèrta o barrada d’Alfred de Musset, Los Barbars de Maksim Gorkii, Los Diablògs de Roland Dubillard, Tutet, trompetas e petarradas de Dario Fo o Gat en pòcha de Georges Feydau.
 
Las tropas, totas amatritz, son sens excepcion de la region de Miegjorn-Pirenèus.
 
Peu primèr còp lo hestenau programa ua pèça en occitan que serà subertitolada en francés. Aquesta navetat es citada dens l’editoriau d’introduccion deu programa escrit peu quite cònsol de Tolosa, Jean-Luc Moudenc. Segon çò que declarèc un deus organizaires, la comuna non seriá pas opausada a ua manifestacion de teatre occitan per la vila.
 
La pèça occitana en question s’apèra Lo tambor de Bara, es ua òbra d’Emili Barta (1874-1939), autor besierenc prolific, director deu jornau Lo Camèl e majorau deu Felibritge en 1925.
 
Dens ua especiariá tenguda per un parelh, un joenòt dèisha en gatge un vielh tambor contra un fricandèu de pagar mei tard. Mes apareish qu’aqueste “encadastre” es ua pèça istorica qu’apertenguèc a un eròi de la Revolucion. Que haràn? Ac diràn au proprietari o ensajaràn de’u crompar per engana? L’òme e la hemna, plan segur, son partejats. E l’espectator, eth, es pas a la fin de las soas suspresas …
 
L’espectacle es assegurat per la tropa Lo Platanièr, basada a Tornafuèlha, ua companhiá tota joenòta (primèra repeticion en noveme de 2013), creada per l’associacion Lo Bolegatoish de la medisha vila, e qu’es ja programada regularament a rason d’un còp lo mes.
 
Lo 27 de heurèr a 21h au Centre Culturau Henri Desbals, Carrèra Henri Desbals. 5 èuros.
 
Entresenhas: +33 (0)6 85 53 87 23
 
 
 
 
Joan Marc Leclercq

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article