Lo país audenc es vodat a la Copa: las mièjas finalas se debanavan dissabte a Lesinhan e dimenge a Limós. La finala se tendrà lo dissabte 11 d’abril a Carcassona.
 
 
Doas mièjas finalas plan diferentas
 
Dissabte, a Lesinhan, Avinhon tenguèt còp pendent mièg temps fàcia als Dragonets que menavan ça que la 18-6 a la pausa. Mas lo segond temps foguèt del tot al tot per la formacion catalana. E coma los melhors traites venon totjorn de ton ostal, lo provençal Joffret, format a Avinhon e ara dobertura dels Dragonets, signèt tres ensages suls nòu de son esquipa. Victòria catalana 54-20 a la fin.
 
Dimenge, ploviá a Limós; Carcassona e Lesinhan prepausèron al public un rugbi estequit basat sus l’afrontament e lo petadedins: una passa, percussion, tengut, una passa... A aquel jòc e amb just çò que caliá de mai d’enveja e de nhac, Lesinhan capitèt a marcar un ensag per son alièr Poggi en fin del primièr temps mai lèst que la defensa canari amb un còp de pè a seguir. Carcassona, en manca bèla d’inspiracion, passèt jamai la rega blanca e es sus la marca a l’anciana de 8-4 que Lesinhan se dobrís lo camin de... Carcassona per la finala de l’11 d’abril.
 
En juniors, Avinhon (venceire de Limós: 40-24) e Carcassona (mai fòrta que Palau: 36-18) se disputaràn la Copa Luc Nitard.
 
Dimenge, plaça a la darrièra jornada de la segonda fasa del campionat Elèit. Lesinhan recebrà Tolosa e, a Sant Estève, Dragonets e Carcassona se disputaràn la segonda plaça, la de la qualificacion dirècta per las mièjas finalas.
 
 
Los Lapinons mai fòrts que los Pols
 
En Austràlia, la segonda jornada del campionat NRL aviá lo dèrbi de Sydney coma cap d’aficha. Al tèrme d’un vertadièr regal de jòc, los campions Lapinons venquèron los Pols: 34-26.
 
 
Mala plena pels Dracs
 
Los Dracs vesián Casty, remés d’una nafradura a la man, tornar sus la pelena e entamenavan coma cal la partida a Hull contra los KR. Menèron 20-4 al cap de mièja ora mercé a quatre ensages signats Tonga, Oldfield, Casty e Pelissièr. Hull KR, realista que non sap, marcava un segond ensag pendent sa segonda ataca del primièr temps (20-10). Mas, de retorn dels vestiaris, los Dracs prepausèron unas quaranta minutas de pòrtas dobèrtas als adversaris que ne demandavan pas tant e que passèron sèt còps la defensa (se se pòt parlar de defensa: èra pas un elefant sens defensa mas un cagaròl sens banetas!!!) catalana: 50-20 al planchòt final.
 
Los Dracs son encara quatrens al classament mas son sièis esquipas que se tenon en 2 punts (4 e 5 punts) de la tresena a la novena plaça a la perseguida de Saint Helens (5 victòrias per 5 partidas) e de Leeds e Warrington (8 punts) .
 
Los catalans demòran en Anglatèrra per trabalhar e refortir aquela pauròta defensa e rescontrar tre divendres de ser Hull FC, per l’ora darrièr de la competicion. Mas Salford e Hull KR èran tanben darrièrs quand rescontrèron los Dracs...
 
 
Preparar deman
 
Dimenge, a Carcassona, a l’iniciativa de l’Ostal dels Joves, se tendrà una novèla edicion del Torneg Grégoire, un dels mai bèls pels joves tretzistas.
 
 
 
 
Alan Roch