Bandièra01 1180x150: Comuna de Tolosa

Actualitats

Dàvid Grosclaude en cauma de la fam

Lo conselhièr regional cèrca de desblocar una situacion creada per l’abséncia de responsa de part dels servicis de l’estat francés tocant l’Ofici Public de la Lenga Occitana

| Gaël Tabarly
Dàvid Grosclaude, conselhièr regional d’Aquitània delegat a las lengas regionalas, es en cauma de la fam dempuèi aqueste 27 de mai, a l’Ostal de Region a Bordèu.
 
“Los signes de mesprètz de part  de l’estat de cap a la lenga nosta que’s segueishen e que’s multiplican. Dab lo darrèr d’aqueths signes, lo pro qu’ei pro! Qu’èi decidit de miar ua accion e que demandi lo vòste sostien. Qu’ei ua accion en favor de la dignitat et de la legitimitat deu noste engatjament per la reconeishença de la lenga occitana”, çò ditz l’elegit occitanista dins son comunicat de premsa.
 
Grosclaude cèrca de desblocar una situacion creada per l’abséncia de responsa de part dels servicis de l’estat francés tocant l’Ofici Public de la Lenga Occitana (ÒPLO). Aquel projècte foguèt votat per las assembladas regionalas d’Aquitània e de Miègjorn-Pirenèus en junh de 2014, mas a l’ora d’ara se constata un “blocatge de l’estat centrau qu’ei permanent quan s’ageish de tractar las questions de las lengas ditas regionaus”, çò apond Grosclaude.
 
Per que l’ÒPLO veja lo jorn oficialament, solament fa mestièr la publicacion d’un decret al Jornal Oficial de l’estat francés. Aital l’ÒPLO se creariá jos la forma d’un Gropament d’Interès Public (GIP). Mas sembla que i a de reticéncias e de mesprètz cada còp qu’aquela question de las lengas es mesa en debat.
 
L’Ofici Public de la Lenga Occitana (ÒPLO) deu èsser un organisme public qu’aurà la tòca de definir una politica publica en favor de l’occitan. Aprovat en junh passat pels conselhs regionals d’Aquitània e de Miègjorn-Pirenèus, aquel esplech deuriá permetre de menar una vertadièra politica publica per l’occitan a l’escala de mai d’un territòri, amb la tòca de far trabalhar amassa de collectivitats e d’operators sul terrenh. D’organismes parièrs existisson al Bascoat e en Bretanha. 


Manifestacion a Carcassona

Divendres que ven, 29 de mai, lo Partit Occitan e lo movement ciutadan País Nòstre, an cridat manifestar a Carcassona en sosten a Dàvid Grosclaude. L'acamp se debanarà a 11h davant la prefectura.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Iniciativa per Occitània Ais de Provença
13.

N’i a pro d’èsser mespresats!

La cauma de la fam es un acte pacific e coratjós, una responsa digna a las politicas injustas. Portam a nòstre compatriòta Dàvid Grosclaude tot nòstre sosten per la cauma de la fam que comencèt lo 27 de mai.

Conselhièr regional d’Aquitània, protèsta contra lo desdenh de l’estat francés tocant la creacion de l’Ofici Public de la Lenga Occitana (ÒPLO), pasmens amplament votada per doas assembladas regionalas d’Occitània, la de sa region aquitana e la de Miègjorn-Pirenèus, en junh de 2014. Mas son accion vòl tanben atraire l’atencion sul mesprètz de l’estat devèrs los ciutadans occitanofòns, e revendica lo respècte de la democracia e de la lenga occitana.

Coma nòstre compatriòta Dàvid Grosclaude, disèm que “N’i a pro d’èsser mespresats.” D’esquèrra o de drecha, los govèrns franceses que se succedisson contunhan la meteissa politica lingüicida e culturicida que definís França dempuèi lo rei Francés Ir. Las promessas electoralas que las fan los candidats a l’eleccion presidenciala, las complisson pas jamai quand son arribats al poder suprèm.

Apelam doncas los occitanistas, delà lo sosten legitim a l’acte eroïc de Dàvid Grosclaude que fa perilhar sa santat per salvar nòstra lenga e nòstra cultura, a se levar totes ensems contra l’estat francés e per convéncer la populacion de nòstre país de l’injustícia de sa politica.

N’i a pro d’èsser mespresats!

Iniciativa per Occitània,
Lo 29 de mai de 2015.

http://iniciativaoc.blogspot.fr/2015/05/ni-pro-desser-mespresats.html

  • 1
  • 0
Gèli Grande Lairac en Agenés
12.

Car David Grosclaude

Lo Partit de la Nacion Occitana (P.N.O.) te pòrta tot lo seu sosten per aquesta accion coratjosa

Gèli Grande
Cò President del Partit de la Nacion Occitana

  • 8
  • 0
lo nimesenc Nimes
11.

Fa gaug de veire que l'occitanisme saup ancara se dreiçar per aver de coratge e de determinacion.

Ne'n cau mai de signes ansin per de dignitat e de valentiá, après lei maucapitadas -per l'abséncia de resultats e lei faussei promessas- dei 5 manif despuèi 2005 a 2012...

Pron de la politica dau poiriment, l'occitanisme espèra sovent passivament. Ara, David Grosclaude es un simbòle de mòstra dignitat.

Cau esperar que lei mèdias de França e dau monde parlaràn d'el, de l'occitan, eça. Cau faire de lobbying!

  • 11
  • 0
IEO-Aude Carcassona
10.

Fasètz seguir dins los vòstres rasals / Information à diffuser au maximum

Dàvid Grosclaude, ancian president de l'Institut d'Estudis Occiatns e conselhièr regional de la Region Aquitània, a pres l'iniciativa de se metre en cauma de la fam al Conselh Regional d'Aquitània per protestar contra lo mesprètz de l'Estat rapòrt a la lenga occitana e, en particulièr , cap als vòtes de las Regions Aquitània e Miègjorn-Pirenèus per l'espelida d'un Ofici Public de la Lenga Occitana ont l'Estat deuriá téner son ròtle per afirmar la reconeissença, lo respècte e la promocion de las lengas de França.
L'IEO-Aude convida totes los amics e amigas de la lenga d'Òc, totes las ciutadanas e totes los ciutadans conscients dels enjòcs democratics de la diversitat culturala, a prene part al recampament per manifestar lo sosten a Dàvid Grosclaude aqueste divendres 29 de mai a 11 oras del matin davant la Prefectura de l'Aude a Carcassona.
Al-delà d'aqueste moment fòrt, una responsa consequenta e dinamica demòra de portar a las questions linguisticas en França. Serà lo sens d'una granda accion collectiva : lo recampament e la manifestacion del dissabte 24 d'octobre a Montpelhièr. De Bordèu a Montpelhièr, un sol crit :
« Anem Òc ! Per la lenga occitana ! »
• Per ne saber mai : http://david-grosclaude.com/

  • 6
  • 0
Pirolet
9.

Aquí una iniciativa coratjosa. Se deurián orgnizar, coma a Carcassona, d'eveniments d'en pertot per far conéisser l'accion de David. E acorchir tant que se pòt sa cauma de la fam en aguent lèu lèu de resultat.

  • 9
  • 0

Escriu un comentari sus aqueste article