Bandièra01 1180x150: País Invisible

Actualitats

La classa politica francesa contra l’emplec del còrs a l’Assemblada de Corsega

Reaccions d’indignacion e colèra a París per l’emplec de la lenga del país dins l’investidura del govèrn de l’illa

La nòva majoritat nacionalista còrsa foguèt investida dijòus 17 de decembre. Jean-Guy Talamoni foguèt elegit president de l’Assemblada e Gilles Simeoni president de l’executiu dins una sesilha qu’aviá pres sos vestits istorics. Un public afogat e nombrós èra present dintre e fòra l’emicicle. Totes los mèdias còrses se focalizèron sus aquel eveniment. La cadena publica còrsa ViaStella seguiguèt aquela jornada en un programa en dirècte de cinc oras de durada.
 
Aquela investidura foguèt un moment d’emocion viva tant pel pòble còrs coma pels pòbles oprimits de l’estat francés e d’Euròpa. Après son eleccion, Jean-Guy Talamoni faguèt un discors entièrament en lenga còrsa. De son costat, Gilles Simeoni faguèt un discors essencialament en francés amb qualques passatges en lenga còrsa. Après aqueles discorses, tota l’assisténcia presenta (a l’excepcion d’una conselhièra del Partit Comunista Francés) entamenèt espontanèament l’imne còrs, Diu vi salvi Regina. L’acte institucional s’acabèt amb un moment de granda solemnitat: lo jurament dels conselhièrs nacionalistas fach sul libre Giustificazione della rivoluzione di Corsica (Justificacion de la revolucion de Corsega) dins son edicion originala de 1764.
 
L’emocion d’aqueles moments, d’una importància capitala per l’istòria de Corsega, durèt pauc de temps. Fins alara los politicians e los mèdias franceses avián totalament ignorat l’eleccion còrsa. Mas bastèt que lo nòu president Talamoni faguèsse un discors de 10 minutas en còrs per que se desencadenèsse dins l’estat francés una ondada publica de corsofobia doblada d’un discors colonialista d’un violéncia esfraiosa.
 
 
De reaccions iradas a París
 
Jean-Pierre Chevènement se declara “estomagat” tant per la lenga del discors coma per son contengut (que ramenta l’existéncia de la nacion còrsa). Jean-Luc Mélenchon, enemic declarat de las lengas oprimidas, declara: “soi ofensat quand lo president d’una assemblada francesa parla pas dins una lenga que compreni”. L’èx-primièr ministre Fillon demanda una intervencion de François Hollande fàcia al “prononciar d’un discors inaugural dins una lenga que, uèi, es pas la lenga de la republica”. La deputada socialista Marie-Noëlle Lienemann, que s’insurgís que lo nòu president “se siá permés de prononciar son discors d’installacion en lenga còrsa”, demanda que lo govèrn prenga de sancions.
 
Del costat dels mèdias, pro de cronicaires se son manifestats, coma Joseph Macé-Scaron de la revista ultrajacobina Marianne. El decreta que “totas las regressions identitàrias son marridas. Aquel identitarisme es una pandemia mondiala”. Lo gropuscul mediatic Boulevard Voltaire clama “Corsega Francesa!” dins un article d’un racisme abjècte. Tocant lo mitan literari francés, l’escrivan Philippe Besson se ditz “escandalizat” per “aquel espectacle de dos elegits”.
 
 
Talamoni: “se son ridiculizats”
 
De son costat, lo president Talamoni a respondut a aqueles atacs amb tranquillitat: “Se son ridiculizats. Los autres païses europèus comprendràn pas çò que los pòt metre dins un tala furor dins lo fach de far un discors dins una lenga qu’es pas lo francés. Es quicòm de totalament absurde e que demòstra la manca de nautor de vista de fòrça responsables franceses. Mas sèm segurs que se’n tròba de mai clarvesents que seràn capables de comprene çò que sèm a far”.
 



— SiwelVent de panique à Paris: les Corses “osent” parler corse chez eux…

— BFMTV: Gilles Simeoni répond aux critiques adressées à leurs discours d'investiture prononcés en langue corse

 
 

Gilles Simeoni, Jean Guy Talamoni et l'exécutif prêtent serment sur la justification de la révolution de Corse in Lingua Corsa

Posted by Alta Frequenza on dijous, 17 / desembre / 2015




Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

"Tàrrega" Igualada (PP.CC.)
7.

Com és posible, en els S. XXI, en una de les preteses nacions mès avançades del Món, és diguin tal quantitat de tonteries juntes.
Diüen que no volen els faixstes, però ells deu-n'hi-do, cuand un poble oprimit salta. carai! Tothom salta!
I això dintre de lo perillós que és, fa molta gràcia.
Però com dic sempre:
Visca la Terra...Lliure!
Un 10 pels Corços.
"Tàrrega".

  • 1
  • 0
Jordi Castro Ripollet, Catalunya
6.

No té sentit romandre en un estat que no respecta la cultura i la llengua de la gent.

Respecte... I independència!

  • 1
  • 0
francesc palma
5.

La brava e bona gent corsa parla sa lenga, han estat fidels a son poble, quatre gats de París s'indignen, és per trufar-se de rire, són ridiculs, tenen comandera, mas fer-los ni cas, sempre hi ha personas humanas e tamben de pardalas.

  • 6
  • 0
Ernèst Guevara Jr. L'Avana
4.

1) Lo simple concèpte de "classa politica" m'es republicanament insofrible ! Los elegits son gents del pòble o d'aristocrat. O cal saber, un còp per totes, e ne deduïre çò qu'a repiblicana rason s'impausa d'esperse.

2) Se ladita classa politica francesa non vòl ausir lo còrs a la assemblada de Corsega, a pas que d'escotar quand plòu a sa finèstra. De tot biais, lo politician de l'asemblada de Corsega son contra l'emplèc del francés colonial e xenofòb a l'assemblada de Corsega. E de çò que los Franceses son per o contra, los de Corsega se'n tondon ben pro, e n'an plan rason. Non sèm pas, los pòbles de la republica, los cans dels Franceses, Sèm tant ciutadans coma eles, se que non plan mai, compte tengut de lor xenofobia clarament anticiutadana e coloniala.

  • 11
  • 0

Escriu un comentari sus aqueste article