Bandièra01 capçalera  1180x150: Novestivada

Actualitats

crotz-tolosaCreated with Sketch.LengadòcLengadòc BasRasés

Onzena edicion del Festenal de Polifonias en Val-nauta d’Aude

A costat dels recitals, se ten un estagi consacrat als cants pirenencs

| GESPPE

A la debuta de setembre, se debanarà l’onzena edicion del Festenal de Polifonias en Val-nauta d’Aude. Aquela manifestacion es menada pel Grop d’Estudi e de Salvagarda del Patrimòni Polifonic d’Eperasan (GESPPE).


Novetat de l’an: en seguida d’una baissa de las ajudas de la Comunautat de comunas “Aude en Pirenèus”, la serada que se debanava las annadas passadas en la glèisa de Quilhan se farà pas. En contra, lo festenal davalarà dins la plana, fins a Limós per reçaupre los caps d’aficha d’aquela manifestacion: los bascs d’Oldarra.
 
A costat dels recitals, se ten un estagi consacrat als cants pirenencs.
 
Rendètz-vos es balhat pel dissabte 1r e lo dimenge 2 de setembre a Esperasan (Rasés) per las personas que vòlon desvolopar tecnica vocala e relacion als autres e conéisser melhor lo repertòri pirenenc jos la direccion d’Emiliana Manescau, escolana de Pascal Caumont e votz del grop Daunas de Còr.
 
Entresenhas e inscripcions per e-mail o al telefon +33 (0)4 68 74 02 50.
 
La particularitat del Festenal es de virar dins las comunas, o mai precisament dins las glèisas, de la Val-nauta d’Aude. Atal, la primièra serada se debanarà tre lo divendres 31 d’agost en la glèisa del Besun (21h) amb lo grop provençal Enco de Botte que canta en òc e en còrse. Puèi, lo dissabte 1èr de setembre, serà doncas la venguda d’Oldarrà a Limós (L’Elisèu, 18h30). Lo dimars 4, lo triò lengadocian Aqueles farà resclantir sos cants dins la glèisa de Sant Ferriòl (21h). Los Pagalhós se produsiràn lo dissabte 8 dins la glèisa de Nebiàs (21h). Lo final se debanarà lo dimenge 9 de vèspre dins la glèisa d’Esperasan (16h) amb lo GESPPE e lo grop pirenenc de Bigòrra Mondeilhs.
 
Atal, un còp de mai, lo festenal mostrarà la riquesa dels cants d’Occitania, de Pirenèus e de la Mar Nòstra. Mai d’informacions sul sit d’Internet.




Alan Roch

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article