Bandièra01 1180x150: Comuna de Tolosa

Actualitats

L’Ofici Public de la Lenga Occitana lança lo Prèmi “Jan Moreu” sus l’innovacion lingüistica

Lo guierdon vòl recompensar un projècte exemplar e innovant sul tèma de la transmission o de l’utilizacion de l’occitan

Jan Moreu
Jan Moreu | david-grosclaude.com
L’Ofici Public de la Lenga Occitana (ÒPLO) lança lo Prèmi Jan Moreu sus l’innovacion lingüistica. Aquel guierdon a per objectiu de favorir las iniciativas collectivas o individualas en recompensant un projècte exemplar e innovant en tèrmes d’accions, de produches o de servicis sul tèma de la transmission o de l’utilizacion de l’occitan. Se pòr premiar un eveniment, un produch numeric, una accion de sollicitacion o sensibilizacion de la populacion, una aisina pedagogica, etc.
 
“Entà contunhar l’accion occitana miada per Jan Moreu, aqueth prèmi que s’adreiça a totas e tots los qui vòlen imaginar, inventar, portar e realizar ua accion dinamica e novatritz au servici de la lenga occitana.” çò estima Charline Claveau-Abbadie, presidenta de l’ÒPLO.
 
La participacion es gratuita, lo prèmi es dotat d’una recompensa de fins a 5000 èuros e los candidats devon mandar lo dorsièr abans lo 31 de julhet. Lo reglament lo cal demandar per email a ofici.occitan(a)gmail.com
 
L’Ofici Public de la Lenga Occitana es un agropament d’interès public qu’amassa l’estat francés amb las regions Aquitània-Lemosin-Peitau-Charantas e Lengadòc-Rosselhon-Miègjorn-Pirenèus. Sa tòca es de definir una politica publica en favor de l’occitan e es installat dempuèi lo 12 de novembre passat al Conselh Regional de Tolosa.
 
 
Un milion d’èuros en ajudas
 
En mai d’aquel prèmi, l’ÒPLO anoncièt lo 22 de març passat un sosten d’1 005 792 èuros a las accions dedicadas a la transmission e a l’usatge de l’occitan., prenguèt aquela decision dins son assemblada generala que se debanèt a Tolosa dimars passat, 22 de març.
 
Aquelas ajudas seràn sustot destinadas al desvolopament de l’ensenhament de l’occitan a las escòlas publicas amb Òc-Bi e a la produccion de material pedagogic per Calandreta. En mai d’aquò, l’ÒPLO anóncia que tanben se subvencionarà amb aquelas ajudas lo Congrès Permanent de la Lenga Occitana, l’Institut d’Estudis Occitans, los Centres de Formacion Professionala Occitans de Tolosa e d’Ortès e los mèdias, mai que mai la television per Internet Òc Tèle e la societat de doblatge Conta’m.

Articles relacionats

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

ltrobat Gasconha
3.

@PJM:
Que podetz constatar qu'au contra de çò que's ditz sus gasconha.com, n'i a pas nada censura suu siti deu Jornalet...

  • 12
  • 11
garric
2.

L'innovacion es lo sol biais de salvar l'Occitan.

  • 10
  • 0
pjm pjm
1.

superba purmèira mesura ende l'OPLO. un pseudo-concors de mei, que lo ganhant serà shens dobtar un amic deu seralh... l'occitanISME avança a grand pas.
shens parlar d'aqueste [o] dens l'intitulat. quò marca ben, miladiu.

  • 40
  • 10

Escriu un comentari sus aqueste article