Bandièra01 1180x150: Comuna de Tolosa

Actualitats

Catalonha Nòrd: front comun d’associacions e d’elegits pel nom de la region “Occitània-País Catalan”

Son a far campanha per portar la revendicacion a las mai nautas institucions de l’estat francés, e cridan a manifestar a Perpinhan lo 10 de setembre que ven

Joan Becat e Eliane Jarucki durant lo debat sul nom de la region a l’Universitat Catalana d’Estiu, a Prada de Conflent
Joan Becat e Eliane Jarucki durant lo debat sul nom de la region a l’Universitat Catalana d’Estiu, a Prada de Conflent | Recours citoyen pour Occitanie Pays Catalan
Las associacions catalanistas de Catalonha Nòrd, los cònsols màgers de 147 comunas e d’elegits del Conselh Departamental dels Pirenèus Orientals an fach front comun per exigir de l’estat francés que la nòva region nomenada “Occitània”, fruch de la fusion de Miègjorn-Pirenèus e de Lengadòc-Rosselhon, comprenga tanben “País Catalan” dins lo nom, çò rapòrta l’Agéncia Catalana de Nòvas ACN.
 
Aquel front comun inedit de Catalonha Nòrd a lançada una campanha per portar la revendicacion a las mai nautas institucions de l’estat francés. Lo primièr ministre francés, Manuel Valls, los a recebuts e ara an demandat una reünion amb lo president francés François Hollande. En mai d’aquò, presentaràn un recors davant lo Conselh d’Estat que deu decidir lo nom definitiu de la region abans lo 1r d’octòbre.
 
 
“Sèm pas contra Occitània”
 
“Sèm pas contra Occitània, sèm en favor del País Catalan”, çò ditz Joan Becat, geograf, professor emerit a l’Universitat de Perpinhan e membre del comitat pel nom de la nòva region (àudio). “Dins l’estat francés, los departaments e las regions an totjorn agut de noms nèutres, geografics o d’ancianas províncias. Ara an causit un nom d’identitat, que fa referéncia a una lenga e una cultura d’una part del territòri. Mas dins la region i a doas lengas e culturas”, çò precisa Becat.
 
Per Becat, lo nom País Catalan a pas de connotacions politicas, mas “es un nom banal que s’utiliza amb absoluda normalitat aicí. A pas res a veire amb las demandas nacionalistas”. Per aquò afirma que pels catalans “nos far desaparéisser nos es insuportable”.
 
Pasmens, Becat pensa que i aurà una solucion consensuala entre catalans e occitans pendent lo mes de setembre.
 
 
Manifestacion a Perpinhan
 
Los promotors del tèxt fan una crida a manifestar a Perpinhan, lo 10 de setembre que ven, per revendicar que lo nom de la region represente tanben sa partida catalana del territòri. Espèran que tota aquela mobilizacion sens precedents siá presa en compte pel Conselh d’Estat a l’ora de validar lo nom de la region. Aquela manifestacion se tendrà un jorn abans la fèsta nacionala de Catalonha, l’11 de setembre, que de manifestacions per l’independéncia son previstas dins plusors vilas catalanas. Los sectors catalanistas de Catalonha Nòrd an lançada una crida als catalans del sud, “coma gèst de solidaritat entre de territòris dels Païses Catalans”.
 
 
Recors administratiu
 
Becat es tanben pòrtavotz de la plataforma “Recors ciutadan per Occitània-País Catalan” que presenta aquel recors al Conselh d’Estat. Lo recors fa valer de rasons culturalas mas tanben de motius de procedura a l’ora de causir lo nom de la region: planhon qu’a la consulta ciutadana se siá pas permés de votar a las personas qu’an pas un telefòn mobil francés. “Lo nòstre avocat nos ditz que lo recors qu'avèm bandit a fòrça escasenças de reüssir”, çò ditz Becat.
 
 
Occitània ganhèt largament lo vòte ciutadan
 
“Occitanie” (Occitània) ganhèt, largament, lo procès participatiu ciutadan per causir lo nom d’aquela region. Lo 45% de las 203 993 personas que votèron causiguèron aquel nom. Los autres tres noms que se podián causir, “Languedoc” (Lengadòc), “Occitanie-Pays Catalan” (Occitània-País Catalan), “Pyrénées-Méditerranée” (Pirenèus-Mediterranèa), se situèron entre lo 10 e lo 12%. Los vòtes se comptabilizèron amb lo metòde de Condorcet.
 
 
Occitània, Pirenèus-Mediterranèa
 
Los elegits de la region adoptèron a la fin de junh lo nom d’“Occitània”, acompanhat del sostítol “Pirenèus-Mediterranèa”. L’assemblada plenièra de la region aprovèt aquela denominacion per 85 vòtes contra 60.
 
Los elegits partisans del nom soslinhèron lo respècte del procès participatiu ciudatan e de la cultura del país. Los opausants critiquèron un vòte ciutadan sens campanha, apelèron a l’indivisibilitat de la Republica Francesa e quitament entonèron de fragments de la Marselhesa.
 
 
Polemica dins l’occitanisme
 
Tanben un sector important de l’occitanisme es malcontent del nom d’Occitània per aquela region, e remembra que la region concernida cobrís aperaquí lo 36% del territòri occitan e concernís solament lo 35% de sa populacion. Una letra dobèrta lançada pel collectiu Òc-Provença es ara signada per 15 associacions e per 73 personas del mitan occitanista d’Occitània tota, e contunha d’amassar de sostens, çò raportàvem sus Jornalet.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

francesc palma de mallorca
12.

Cal pas oblidar Pais Català. Es una questión de dos e podem acceptar una omission xovinista.

  • 0
  • 0
Pirolet
11.

Ai plan vist o la piòta qu'es a costat d'en Becat pòrta "PARIS" sul camiset?

  • 5
  • 0
Emmanuèl Isopet
10.

Vos dirai pas çò que pensi d'una region que s'apelariá (non, pas Quezac!) « Occitània-País Catalan » (ai encara un instinct de subrevida, mèrda!), mas espèri qu'amb aquel polit discors lo departament vailetjat per Perpinhan s'apelarà « Catalunya-nòrd-Fenolhedés » o quicòm atal. En tot cas seriá estonant qu'ajan pensat a l'apelar simplament « País Català » « Catalunya-nord » o « Rosselló ».

  • 3
  • 0
SOM i SEREM
9.

#6 Me permeti, ambe tòt lo respècte, de joslinhar qu'aquelas responsas son une ilustracion de la contaminacion de força monde, quitament occitan (?), pels topics e pels luòcs comuns , difusats per la "doxa" franchimanda e lo sieu estat.

Occitanistas, avèm força trabalh per faire tornar lo monde a soscar per se meteis e a s'apropriar la seua vertadièra istòria e aquela de nòstres fraires catalans !

  • 2
  • 6
Casa Mars
8.

Una precision: la letra dubèrta per denonciar la chausida de "Région Occitanie" es ara signada per 17 associacions e 123 actors e actritz dau movement occitan (Moussu T, Joan Maria Carlotti, André Neyton, Laurenç Gosset, Felip Martel, Josiana Ubaud, Jean Frédéric Brun, Manu Theron e un molon d'autres...)

  • 9
  • 4

Escriu un comentari sus aqueste article