Bandièra01 1180x150: Comuna de Tolosa

Actualitats

“Òc around the clòc”: las 24 oras d’occitan tornan

De uèi, 29 d’octobre a mieidia a deman 30 d’octobre a una ora (pr’amor deu passatge a l’ora d’invèrn) se debanarà sus Internet  la dusau edicion de las “24 oras d’occitan”. Ongan, aqueste “eveniment web” se trobarà sancèrament sus la tela. Sufirà pas que de’s botar sus la pagina dedicada per seguir lo programa que promet d’estar ric.
 
Cada dètz minutas (au minimum) apareisharà una navèra vidèo relativa a la creacion en lenga occitana, que sia literària, musicala, teatrala o informativa. Per balhar un petit abansgost de çò que serà perpausat, podèm citar los noms deus “istorics”: Martí, Padena, Rosina de Pèira, Nadau, Jacmelina, Mans de Breish, Patric, e deus mès actuaus coma: Lo Dàvi, Cocanha, las Mondinas, Aqueles, Arnaud Cance, Du Bartàs, etc …
 
Solide, las vidèos seràn vesederas encara un bon moment mès tard. Serà la purmèra pèira d’un projècte mès bèth que’s perpausarà d’estar una veirina completa de tot çò que’s hè en occitan dens totis los maines.
 
Segon Joan-Marc Leclercq, president deu Bolegatoish e secretari de l’IEO de Garona Nauta qu’organizan l’eveniment (tanben collaborador de Jornalet), la formula 2016 es tanben un ensag. L’an passat, las 24 oras a l’Ostau d’Occitània a muishat que pòdon amassar monde, mes sus una jornada sancèra, tot aquò sembla diluit per moments.
 
De mès, la volontat d’una visibilitat mès grana es fòrta, e la telaranha sembla l’atruna ideau per aquerò. L’an que veng, podèm pervéser una mescla de causas programadas e d’espectacle vivent, gràcias a aplicacions coma Facebook e Periscop per exemple.
 
 
 
 
JML
 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Mentonasc Mentan
2.

Excellenta iniciativa! Me languisso d'o veire!

  • 0
  • 0
Pèire Richièr Vilofrac
1.

Véder apareishar una vidèo, aquò es estranh.

  • 1
  • 0

Escriu un comentari sus aqueste article