Un vidèo publicat sus Facebook lo 27 de març passat mòstra l’arrestacion violenta d’un parelh e de sos enfants dins un tren a Menton, près de la frontièra estatala. Sul vidèo se pòt veire de policièrs qu’emplegan la fòrça per far sortir del vagon lo marit, sa femna prens e lors enfants.
 
La situacion degenèra lèu-lèu quand lo paire de familha refusa de descendre del tren e de presentar sos papièrs d’identitat. Alavetz los policièrs li vòlon prene son mainat. “Donatz-me vòstre enfant, donatz-me vòstre enfant”, çò dison los agents mai d’un còp del temps que lo nenet brama.
 
“I aviá qu’una soleta familha de color dins lo tren, e es ela qu’es estada contrarotlada”, çò explica un dels autors del vidèo a InfoMigrants.  Los autors del filmet son tres estudiants de jornalisme que tornavan d’un reportatge a Ventemilha, lo 26 de febrièr passat. Aquela linha de camin de fèrre es fòrça emplegada per de migrants e refugiats qu’en provenença de l’estat italian vòlon aténher l’estat francés.
 
Tanben InfoMigrants rapòrta que contactèt la prefectura dels Alps Maritims per ne saber la version oficiala, mas que per ara a pas respondut a lors sollicitacions.
 
Lo filmet publicat sul ret social foguèt sul pic repartejat per l’associacion d’ajuda als migrants Ròia Ciutadana. “Aqueu genre de contraròtle musclat arriba ailàs frequentament”, çò ditz Cédric Herrou, conegut activista de l’associacion umanitària roiasca. “Avèm plusors autres vidèos de violéncias policieras”.
 
Los migrants interpellats dins aqueles trens son generalament mandats dins los locals de la polícia de las frontièras (PAF) e escortats vèrs l’estat italian, mai concretament “a onze quilomètres de Ventemilha”, çò precisa Herrou. “Cada jorn i a una pichona desena de policiers en gara de Menton. Quand lo tren arriba, quaucu unu montan. Inspèctan los vagons, regardan toi lu negres e demandan lu sieus papiers. Es clarament de contraròtle au faciès”, çò apond.