Bandièra01 capçalera  1180x150: Novestivada

Actualitats

Lo jutge Llarena a Mireia Boya: “Se volètz, vos fau perseguir tanben per rebellion”

L’èx-deputada occitana diguèt que li semblava injust d’èsser enseguida per “desobesisença” per aver prepausat un debat del temps que Carme Forcadell es en preson jos l’acusacion de “rebellion” sonque per l’aver permés

Mireia Boya en intrant dins lo palai de justícia
Mireia Boya en intrant dins lo palai de justícia | ACN
L’èx-deputada occitana del Parlament de Catalonha Mireia Boya compareguèt ièr un còp de mai davant lo jutge de la Cort Suprèma, a Madrid, per recebre son verbal per desobesissença. Tanben i èran los èx-ministres regionals Meritxell Borràs, Carles Mundó e Santi Vila, totes enseguits per “desobesissença” mas non pas per “rebellion”. La sesilha se debanèt amb fòrça tension.
 
Boya li diguèt al jutge que li sembla pas just que foguèsse perseguida en justícia per “desobesissença” pel fach d’aver prepausat un debat al Parlament de Catalonha, mentre que la presidenta d’aquel parlament a la meteissa epòca, Carme Forcadell, es enseguida e encarcerada per “rebellion” pel fach d’aver permés aquel debat. Lo jutge Pablo Llarena respostèt alara a Boya: “Se volètz, vos fau perseguir tanben per rebellion”.
 
L’audiéncia comencèt tard, que la deputada occitana arribèt amb 25 minutas de retard, e son avocat de Boya èra pas vestit d’una tòga. Puèi, l’èx-deputada aranesa diguèt qu’aviá idèa de respondre solament a las questions del jutge, del temps que lo jutge afortissiá qu’aviá pas cap de question de pausar. En seguida, Boya expausèt sas consideracions envèrs son procès:
 
“È exprimit es mèns dobtes sus era parcialitat de tot aguest procès juridic. Es interlocutòries an indicis de parcialitat. E li è dit que demori damb resignacion ua senténcia que creigui que ja ei escrita. De hèt, era interlocutòria se semble fòrça ad aguesta senténcia e li è dit qu’aguest jutjament ei teatre, ei ua pantomima politica, e qu’eth vertadèr jutjament serà a instàncies internacionaus”.
 
E mai Boya precisèt que foguèt una “aubediéncia a un mandat popular”, e qu’”eth dret d’autodeterminacion eth ath dessús d’auti drets dera Constitucion, coma eth dera unitat d’Espanha”. Ansin apondèt que “dilhèu cau cambiar es leis entà hèr ua societat mès democratica” en soslinhant que, pr’amor del foncionament de la CUP per assembladas, de l’acusar a ela es acusar tot lo grop politic.

 
De legir: entrevista de Mireia Boya sus VilaWeb.

 






abonar los amics de Jornalet

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Pirolet
4.

Aquel jutge Llarena a degut far un estagi al Clapàs amb lo rector de la fac de drech, lo torçut rector Pétel.

  • 3
  • 0
Marcellin A. Argiliers
3.

França e Espanha, doas putas d'estats mafioses.

  • 7
  • 0
Viva
2.

Òsca Mireia!
Dignitat e fòrça de vertat!

Sosten d'Occitània tota.

  • 11
  • 0
Black Blòc
1.

Lo jutge Llarena a Mireia Boya: “Se volètz, vos fau perseguir tanben per rebellion” ! E lo jutge, se volèm, la fasèm preseguir davant un tribunal penal internacional per aver trepejat los dreits umans ?

  • 10
  • 0

Escriu un comentari sus aqueste article