Bandièra01 capçalera  1180x150: Novestivada

Actualitats

Estats Units: repression contra un activista negre per sas publicacions sus Facebook

Après cinc meses de preson, Rakem Balogun revèla a The Guardian un programa secret per susvelhar los diches “extremistas de l’identitat negra”

| Allison V Smith / The Guardian
Lo 12 de decembre passat dins la nuèch, arrestèron l’activista negre Rakem Balogun a son domicili de Dallas (Estats Units) per sos comentaris publicats sus Facebook que criticavan la polícia estatsunidenca. Ara ven de sortir de preson, e los jornalistas de The Guardian an parlat amb el.
 
A passat cinc meses encarcerat sens caucion mentre que los procuraires ensajavan de trobar un biais de justificar sa detencion, quitament en l’acusant de possession d’armas o d’èsser una menaça per las fòrças de seguretat. “Es la tirania perfiècha”, çò ditz. “Ai pas res fach d’illegal que justifique la susvelhança, ai pas fach cap de damatge a degun ni menaçat qui que siá”. Balogun es informatician, a 34 ans e un enfant. Durant lo sojorn passat en preson a perdut son ostal. Quand l’arrestèron, trabalhava dins una societat d'informatica.
 
Segon lo jornal britanic, Balogun seriá la primièra persona perseguida en justícia sus un programa secret dels Estats Units per susvelhar los diches “extremistas de l’identitat negra”. D'efièch, un rapòrt de l’Unitat d’Analisi del Terrorisme Interior de l’FBI, que ne foguèron assabentats los mèdias, parlava d’una “resurgéncia de l’activitat criminala violenta amb de motivacions ideologicas” a causa de las “percepcions de la brutalitat policièra” de part dels afroamericans.
 
Los messatges pels quals l’arrestèron èran justament d’eslogans sortits de manifestacions de la comunautat afroamericana contra la brutalitat policièra.
 
Balogun diguèt als jutges qu’aviá publicat aqueles messatges sus Facebook quand se desbondava, enferonit pels famoses afars de policièrs qu’als Estats Units avián tuat d’òmes e de femnas negras innocentas; podiá pas pus temporir lo tractament que ne fasián los mèdias en justificant aqueles murtres.
 
Ne podètz trobar mai d’informacion sus The Guardian.
 




abonar los amics de Jornalet
 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Lo Cagadiu
5.

#4 Vertat. A tau punt que dauvuas familhas e tremeishen péger que tot a l’idea d’un gendre o d’ua nòra atèa. Mes bon, en generau los atèus no’s hèn pas secutar o tirar per carrèras, e dab los "agnostics" e "indiferents" que hèn un grop demografic en aumentacion, dab un debat public anant e sanitós e un ahoalh de pòrtavotz tà l’ateisme militant o tà la laïcitat.

Los negues n’ei pas parièr. Cada setmana au mei baish, ua persona nega innocenta e desarmada qu’ei arrestada o medish assassinada peu sol crimi de trobà’s suu passatge deus casquetats, o d’un blanc qui l’agi trobat un aire safranós.
Exemples recents:
- arrestats pr’amor d’aténer un amic abans de comandar au Starbuck (Rashon Nelson & Donte Robinson);
- controlats sus denóncia d’ua vesia pr’amor que sortivan d’un airB&B dab los bagatges (Donisha Prendergast et al.);
- controlada a l’universitat sus denóncia d’ua auta estudianta pr’amor que s’èra aclucada en la sala d’estudi deu son dormitòri, en preparant los examèns (Lolade Siyonbola)…
… hasent díser a l’autora de l’article : «que hè de maishant evitar la conclusion que los qui apèran la polícia ac hèn pr’amor qu’estiman, conscientament o non, que lo monde de color n’i deurén pas estar, o que representan ua miaça.»
Qu’emplega l’expression: «people of color simply don’t belong» de mau virar. Quauquarren com: «ne son pas de la consia», «que son per natura estrangèrs»…
Los mèdias qu’an inventat ua expression ironica tà denoncià’c: «while black», «en tot estar negue», com si èra un delicte e si èran negues per exprès, entà embestiar/intimidar lo monde. Exemple: «un joen tuat per la polícia en lo son jardin per aver emplegat lo son telefonet en tot estar negue (Stephon Clark)»…
Las arremarcas embijarradas de Rakem Balogun que’s deven compréner en aqueth contèxte.

  • 2
  • 0
Winnie Mandela
4.

#2 Per anar en democracia estatuniana, cal anar blanc e cresent. L'ateïsme tanplan es fòrça plan percebut, e pas gaire acceptat. Es un país dominats per de maròls destimborlats e aganits de moneda. E dire que servís de modèl obligat a tota la planèta ! Quina mala passa…

  • 2
  • 0
Angela Davis Bob Marley-Land
3.

#1 Los Estats Units son una democracia basta qu'òm siague blanc. Tan coma França es una democracia basta qu'òm siague aparisenquit. Per venir aparisenquit sufis de prene l'accent parisenc e de se convertir a la mentalitat parisencassa. Per venir blanc, coma o-vòl implicitament la democracia americana, aquò sembla fòrça mai complicat. Resistar!

  • 5
  • 0
Pirolet
1.

Los Estats Units, es pas la mai granda democracia del mond?

  • 7
  • 0

Escriu un comentari sus aqueste article