Bandièra01 1180x150: País Invisible

Opinion

De fòrabanda (1973) a forabandit (2011)

Alem Surre-Garcia

Alem Surre-Garcia

Cargat de lenga e cultura occitanas alprèp del Conselh Regional Miègjorn-Pirenèus de 1989 a 2006. Traductor, escrivan, poèta, assagista, autor dramatic, conferencièr o organisaire d'esveniments culturals.

Mai d’informacions
A la question que pausèt lo Cirdoc a l’Estivada de Rodés lo 27 de julh “Ten Occitània una istòria ?”, segur que podem respondre de òc e de mai d’un biais. Un d’aquel biais, aquò’s de considerar l’espelison e la durada dels concèptes. Per qué d’unas associacions, d’unes grops musicals o d’unas revistas tornan prene en los adaptar  los concèptes de la civilizacion dels Trobadors coma Fin’amor, Trobar, Paratge, Gai saber, amor de lonh e tantes autres? Aquí plantejat un questionament de fons e dels bèlses : una civilizacion viu dal moment que sap manejar e impausar sos concèptes.
 
Prengam un exemple d’actualitat, la sortida ongan del CD titolat “Forabandit ”. Lo grop format per los musicaires Sam Karpiena, Ulas Özdimir e Bijan Chemirani lo creèron  en 2011. “Forabandit”, çò escrivon, vòl dire “être mis à l’écart”. Frederic Mistral dins son “Tresor ” prepausa : “banni, exilé, expulsé, vagabond”, un qualificatiu mai que mai d’actualitat. Los tèxtes poetics causits per lo CD son d’omenatges a totes los forabandits de las terras d’Occitània, d’Anatolia e d’Iran o d’endacòm mai. Atal denóncian las istòrias oficialas que glorifican los chaplaires e que menan d’unes a l’embarrament tan fisic coma mental. Une mesa en miralh, un perfum d’eterodoxia, un buf de subversion.
 
Se trapa que gaireben quaranta ans en rè, un grop d’òmes e de femnas occitans se recampèron a Paris, en 1973, sota lo nom de “Fòrabanda”. Se sentissián d’aquel temps exiliats dins lo nòrd de França e doblament marginalizats coma occitans e coma exiliats. Farguèron entre 1973 e 1977 uèit numeròs d’una revista que sa tòca èra de levar critica tant al dintre d’Occitània coma al defòra.Atal foguèron analizats lo masclum e la situacion de las femnas, lo folclòr e lo sudisme e tanben, çò qu’èra una primièra, las diferentas sexualitats. Un cambiament d’amiras: las mapas d’occitània foguèron enversadas per  se melhor conectar amb las peninsulas iberica e italica e amb lo Levant a travèrs de la mar. Totas aquelas idéias foguèron portadas a l’Universitat occitana d’estiu de 1997 e i aguèt d’unas reticéncias. “Sem de metècas” aviá proclamat un article de 1974.
 
Quaranta ans de caminament d’un concèpte, aquí lo resumit d’una representacion mentala collectiva d’apondre a l’istòria occitana qu’es tanben l’istòria d’un desir a de còps concretizat e sempre remenat.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Joan
3.

Lo CDROM :
Forabandit
Sam Karpienia, mandoloncelle, voix - Ulaş Özdemir, bağlama, voix- Bijan Chemirani, zarb, percussions

CD 860223, distribution France : Socadisc

( http://www.budamusique.com/infos/ )

Vaqui ! Lo Joan de TLS

  • 0
  • 0
cissonet occitània
2.

"Forabandit" (Buda Musique, ref. 860223, 16€)

Còla vista l'an passat al festenal de Correns. Espèri que fan pas partida d'aqueles "concèptes" cars als "pensaires" de las "musicas del monde" que fan se rescontrar los artistas lo temps d'una residéncia, d'una virada e d'un CD mas que duran pas mai. Abans de passar a un autre "rescontre" conceptualizat...
Aquò se sona l'intermiténcia de l'espectacle.

  • 1
  • 0
Avicèna Tolosa
1.

Nos caldriá d'informacions mai pragmaticas, en mai d'aquestas, per poder trobar lo CD (editor, o adressa per lo comandar). Qualqu'un o sap, se vos plai ?

  • 0
  • 0

Escriu un comentari sus aqueste article