Bandièra01 1180x150: País Invisible

Opinion

Eleccion de Donald Trump

Joan-Peire Alari

Joan-Peire Alari

Professor agregat d'anglés, retirat de la facultat de Bordèu III, especialista de civilizacion americana, ancian professor d'occitan, cap redactor de la revista Lo Lugarn, escrivan e cronicaire occitan, militant politic occitan.

Mai d’informacions
Nos despertam amb una novèla que, quitament s’es desagradiva, èra pas del tot inesperada e dont los sobeiranistas franceses de tota mena se regaudisson d’un biais brusent. 
Donald Trump es elegit president dels USA amb una majoritat republicana dins las doas cambras del Congrès. Poirà donc far plan de degalhs sul plan interior e exterior, quitament se poirà pas far tot çò qu’a anonciat pr’amor de las constrenchas internacionalas. Lo regèt del sistèma politic e dels elèits jutjats corromputs que coneissèm en Euròpa, mena a l’arribada d’un demagògue al poder a Washington. Solide, podèm incriminar lo liberalisme economic e una mondializacion que, totben qu’aja redusit la pauretat sul plan mondial, faguèt pèrdre de milions d’emplecs dins l’industria als USA e endacòm mai.
 
La pèrda d’emplec per una franja importanta de la populacion causa tanben una crisi identitària e de reaccions de regèt rapòrt a las minoritats etnicas e als migrants als USA. Coneissèm aquel fenomèn coma coneissèm sus las doas ribas de la Mar granda la menaça del terrorisme islamic e la crisi identitària. D’ara enlà, en çò nòstre, l’eleccion de 
Marine le Pen coma presidenta de la Republica ven del tot possibla.
 
Coneissèm tanben las consequéncias qu’aquò pòt entraïnar: l’espetament de l’Union europèa ja en marrit estat aprèp lo Brexit e la crisi en Grècia. Los pòbles, un pauc de pertot dins lo mond, quand pòdon s’exprimir democraticament, vòtan contra lo sistèma, mas en far aquò, lo remplaçan per quicòm de pièger. Los podèm persuadir de far pròva de mai de sang freg? Es pas segur s’en manca. Dins l’Estat francés, l’esquèrra es embricalhada, la drecha va 
causir demest de candidats totes sortits del sistèma. Es pas estonant que 
maites ciutadans se digan: perqué pas ensajar lo FN? Es pas nòstra denonciacion incantatòria del raubatòri d’identitat etnica en Occitània pel FN que va enraiar lo fenomèn. Òc, l’eleccion de Donald Trump nos apostròfa. Es temps de cambiar de logicial. Se tracha pas solament de far barratge a Marine le Pen abans qu’arribe al poder o quand i serà mas de prepausar una alternativa fisabla al nacional-populisme demagogic que serà sorga de crudèlas desillusions. Entretant, serà preferible de votar,  (e pas un 
vòte blanc o nul) emai la causia foguèsse pas estrambordanta puslèu que d’anar pescar a la linha, si que non aurem pas que çò que meritam. Christian Troadec obtendrà los 500 pairinatges?
 
Aquò depend en partida de nosautres.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Batko
5.

#4 Per astre, l'esperit uman a mès d'imaginacion qu'aquestes pauques sistèmas deus quaus parlatz. L'avénguer es la Democracia Dirècta, que caleré díser "la Democracia", que l'auta (la representativa) n'es pas. Sabi dejà a l'avança qu'anatz me díser qu'es pas possible.
Solide qu'es possible, mes demanda una auta organizacion deus territòris, de cap a autonomias vertadièras de las entitats culturalas. I arribaram, mes pauc a pauc ...

  • 4
  • 0
andrieu
4.

#1 Òm pòt dificillament metre totes los politicians dins la meteissa saca. Los sacamands, los poirits,... n'i a pertot, demest las pauras gents e las que son amonedadas tanben.
La dictadura del proletariat, avèm donat ; l'economia de mercat, donam dempuèi qualque temps... e es pasfenit !
Se cal tornar cap a Churchill benlèu e çò que disiá de la democracia mas nos cal sustot far de politica e, coma o an dich Kennedy e d'autres : Vos cal pas demandar çò que vòstre país pòt far per vos mas si ben çò que podètz faire per vòstre país...

  • 2
  • 0
Batko
3.

Comprengui pas perqué l'eleccion de D. Trump daubriré aquela de M. Le Pen.
Quan Obama estoc elegit, degun a pas hèit un tau parallèla dambe l'Estat francés.

De mès, lo tèxte semblaré nos díser que cau contunhar de votar peu "sistèma" end'evitar los demagògas nacionalistas. Per astre, l'esperit uman es pro ric end'imaginar autas causas que sian pas çò que coneishèm ara e de qué patissèm, o un nacionalisme de retorn a l'endarrèr.

I a totjorn d'autas solucions e d'autes mondes possibles.

  • 2
  • 1
Alari Agen
2.

Quina argumentari fosc! Eri pas estrambordat per Hillary Clinton mas me regaudissi pas de la victoria del demagogue Trump.
Ai pas l'impression d'èstre despassat per la politica mas puslèu despoderat.

  • 5
  • 1
Lachaud Pierre
1.

Hiary Clinton, pas eligida? Tant mielhs. Fai partida de la clica dau Clinton, Bush, Rockfeller, Rotschild, Sarkozy, Olande, Mitterand , qu'an fach plan de desgats dins lo monde: destabilisacion de la Libia, de l'Irak; de l'Arabia Saodita e d'autres pais africans. Donald Trump es pas mielhs mas aura pas tant de poders. La canoniera qu'autre còp colonisava Chines es pus occidentala mas russa, chinesa e mesma iraniena. La stabilitat politica, lo poder financier se tròban aura dins aqueus pais.
L'ennemic seria lo Front nacional, l'islamiste, uei? Creses que los autres an p'una responsabilitat? Chaldria militar, militar enguera e enguera? Militar quò usa los nerfs e las sòquas!
Marina Lo Pen es desjà au poder perque l'esquera e la dreicha an besonh d'un espauridor per far passar una politica desjà fascista.
En politica se passa de las causas que nos despassan perque avem jamai saugut impausar la bona mentalitat basada sus l'amor e la patz, perque avem p'un poder de zo far, sem pas autorisat a zo far. Darrier los politics qui commande?
Deman sem convidats a anar aus monuments aus morts per saludar los "morts per la Patria", mas pas per saludar los qu'an credats "morts a la guerra; pus jamai de guerras, ..."

  • 6
  • 7

Escriu un comentari sus aqueste article