Bandièra01 1180x150: País Invisible

Opinion

President sordanha

Per venir menaire d’avion cal aprener lo mestièr. Per venir fustièr cal aprener lo mestièr. Per venir contrarotlaire a la SNCF cal aprener lo mestièr. Per venir maselièr cal aprener lo mestièr. Per venir President de la Republica cal pas aprener lo mestièr. Es urgent que lo President de la Republica aprenguèsse lo mestièr.
 
Es pas per qué l’òm sap laurar que l’òm sap menar una bòria. Es pas per qué l’òm sap levar una paret que l’òm sap menar una entrepresa del bastiment. Es pas perqué l’òm sap escriure una letra que l’òm deven escrivan de mestièr. Es pas per qué l’òm sap jogar de guitarra que l’òm ven guitarrista professional.
 
En politica es al evèrs. Podètz èsser elegit conse sens saber cossí marcha una comuna. Podètz èsser elegit conselhièr territorial sens aver jamai botat los pèses dins un conselh territorial. Podètz èsser elegit deputat a l’Amassada Nacionala sens saber de que se passa a l’Amassada Nacionala. Podètz èsser causit Ministre de la Santat amai se i coneissètz res sus la santat dins lo país. E podètz èsser elegit President de la Republica sens ges de mandat electoral abans.
 
Per totas e totes los òmes politics benlèu que la formacion en alternància coma se practica a l’ora d’ara per aprene un molon de mestièrs seriá nescita. Cossí parlar de çò que l’òm coneis pas vertadièrament e prigondament? Aquela formacion deuriá s’adreiçar al President de la Republica coma a totas las elegidas e elegits.
 
Seriá aprener lo mestièr que de passar cada mes una setmana d’estagi de practica acompanhada amb una ajuda sonhanta a l’espital, una setmana amb una ensenhaira de mairala, una autra setmana amb un escobilhaire, puèi amb portur, amb un soldat... un responsable sindical.... un conse...
 
Ajudariá lo personal politic e lo President en primièr a tocar de prèp la realitat del país que governan. Sens aquò far, cossí volètz que parlèsson de totes los subjèctes de la vida vidanta soncament tras de dossièrs aprestats per d’enarcas encabanats dins de burèus, pegats de longa a lor ordenadors. Seriá bon per eles qu’aquela in-formacion lor permeteguèsse de passar de la vida virtuala a la vida reala.
 
Benlèu que destapariá las aurelhas al President. A la plaça d’entendre, benlèu escotariá amb d’ausidoiras passadas a la molineta de la vida vidanta. Seriá mens sordanha qu’un topin. Me dirètz, i a ges de pus sord qu’aquel que vòl pas entendre!
 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article