Catalonha Nòrd es assecarida. Vergièrs, selva, pradas,... mancan d’aiga. Flumes, rius,... son assecats.

Se pòt pensar qu’aprèp aqueles dels P.O. (Pirenèus Orientals) d’autres flumes d’Occitània s’assecaràn. E aprèp Occitània, perqué pas Euròpa tota e puèi Planeta tota? Que far de totes aqueles flumes assecarits?

Vesi ja los promotors immobiliaris acarnassits, relucar aquels terrencs, aqueles espacis novèls. Poirián emplegar lo lièch del flume per i bastir ostals, lotejaments novèls o barras d’immobilièras. Sens PLUèja un PLU novèl ponchejarà. Somian benlèu ja a la palhassonada d’euròs qu’amassaràn amb aqueles espacis novèls de conquistar.

Vesi ja las societats autorotièras se lecar las babinas a l’idèa de far dels flumes d’autòrotas novèlas. E viatjar aital de Tolosa a Bordèu dins lo lièch de Garona alquitranat. E viatjar aital de Lion a Avinhon dins lo lièch de Rose alquitranat. Vesi ja los ponts qu’escamba los rius venir airas de descansa.

Vesi ja la D.I.R. (Direccion Interdepartamentala de las Rotas) far dels rius de rotas nacionalas novèlas. Aital aurián las nacionalas Dordonha, Ador, Òlt, Tarn, Lèira, Durança ... Aqueles noms serián belcòp mai polits que las letras e chifras que coneissem a l’ora d’ara. Un trabalh gròs espèra los bailejaires dels GPS dins als annadas venentas.

Pel riussets benlèu que los alquitranarián tanben e aital aurián de rotas departamentalas nòvas coma Viaur, Tarnon, Mimenta,... Biais de desenclavar, coma dison, un pauc mai aquelas encontradas dichas a l’escamàs.

 Pels valats e valadets, segur, que los apassionats de V.T.T. se carraràn de rotlar dins los lièchs d’aqueles riussonets e de jogar a salta paissièra. Un molon d’anèlas d’escorregudas seràn benlèu dobèrtas. De guidas novèlas pels vetetistas espeliràn.

Se per malastre, la secada pertocava lo Canal del Miègjorn e que l’asequèsse coma bana d’aret, l’òm podriá benlèu pensar que seriá lèu alquitranat el tanben. Que ne farián una nacionala a via dobla. Veituras qu’arremplaçan batèus.

Anatz dire que tot aquò son pas que de rasonaments e avètz segurament rason. Mas oblidem jamai que la natura a orror del voide!